कर्णाली प्रदेशको राजधानी सुर्खेतमा पहिलोपटक भलिबल रेफ्री तालिम आयोजना हुने भएको छ । आज (मंगलबार) देखि उद्घाटन हुने तालिमको प्रशिक्षण नेपालकै एकमात्र अन्तर्राष्ट्रियस्तरका रेफ्री गौतमप्रसाद लासिवाले गर्ने आयोजकले बताएको छ ।

सुर्खेत जिल्ला भलिबल संघको आयोजना तथा नेपाल भलिबल संघ त्रिपुरेश्वर काठमाडौंको समन्वयमा हुन लागेको भलिबल रेफ्री तालिम असोज २ गतेदेखि ६ गतेसम्म चल्ने नेपाल भलिबल संघका केन्द्रीय सदस्य तथा कार्यक्रम संयोजक सोमबहादुर श्रेष्ठ (मंगल) ले बताए ।

प्रदेशस्तरीय तालिममा कर्णाली प्रदेशका सबै जिल्ला र प्रदेश ५ तथा ७ बाट समेत सहभागी आउनेछन् । तालिममा करिब ७० जनाको सहभागिता रहनेछ । कर्णाली प्रदेशमा यो पहिलो भलिबल रेफ्री तालिम भएको जिल्ला खेलकुद विकास समिति सुर्खेतका अध्यक्ष तथा सुर्खेत जिल्ला भलिबल संघका अध्यक्ष चन्द्रकुमार गिरीले जानकारी दिए ।

तालिमको उद्घाटन कर्णाली प्रदेशका प्रमुख दुर्गाकेशर खनालले गर्नेछन् । खेलमा सहभागीले आफ्नो खर्च आफैंले व्यहोर्नुपर्ने र सहभागीले ३५ सय सहभागी खर्चसमेत तिर्नुपर्ने आयोजकले बताएको छ ।

प्रकाशित समय : १२:१७ बजे