रौतहटको गरुडा नगरपालिकाको महम्मदपुर स्वास्थ्य चौकीको वर्थिङ सेन्टरमा कार्यरत नर्सहरुले सुरक्षाको माग गरेका छन् । होम डेलिभरिका लागि घर–घरमा नआएको भन्दै स्थानीयले आक्रमणको प्रयास गरेको भन्दै नर्सहरुले सुरक्षाको लागि प्रहरी कार्यलयमा निवेदन दिएका छन् ।

वर्थिङ सेन्टरमा कार्यरत नर्स मीरा धिताल लगायतका ४ जना नर्सले सुरक्षाको माग गर्दै बुधबार प्रहरी चौकी गरुडा पुगेर निवेदन दिएका हुन् । होम डेलिभरिका लागि घर–घरमा नआएको निहुँमा स्थानीय हरीनारायण गुप्ता लगाएतको समूहले आक्रमणको प्रयास गरेको नर्सहरुले गुनासो गरेका छन् ।

घरमै गएर प्रसूति सेवा दिन इन्कार गरेको विषलाई लिएर स्थानीयले धम्काउने गरेको भन्दै नर्सहरुले उजुरी दिएको गरुडा प्रहरीले न्यनुजकारोबारलाई जानकारी दिएको छ । नर्सहरुले स्थानीय हरिनारायण गुप्ता, बिटु गुप्ता र उमेश यादव विरुद्ध किटानी जाहेरी दिएका हुन् ।

स्वास्थ्य संस्थामा रहेको अरु स्वास्थ्यकर्मीले पनि धम्काउने गरेको पीडित नर्सहरुले बताएका छन् । उजुरी परेपछि प्रहरीले एक जनलाई पक्राउ गरेको छ । घटनाका विषयमा अनुसन्धान भइरहेको प्रहरीले जनाएको छ । स्वास्थ्य संस्थामा दिनहुँ ९–१० जना महिला प्रसूति सेवाका लागी पुग्ने गरेका छन् ।

प्रकाशित समय : २०:१३ बजे