काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

कांग्रेसको महासमिति बैठक सुरु

13.55K
shares

नेपाली कांग्रेस महासमिति भेला काठमाडौंमा सुरु भएको छ । महाधिवेशन हुने वर्षलाई छाडेर प्रत्येक वर्ष गर्नुपर्ने व्यवस्था भए पनि ६ वर्षपछि काठमाडौंमा महासमिति भेला भएको हो । पार्टी मुख्यालय सानेपामा सहभागीले रजिस्ट्रेसन गराउन थालेका छन् ।

बग्गीखानास्थित यलम्बर पार्टी प्यालेसमा शनिबार महासमिति भेलाको औपचारिक उद्घघाटन हुँदैछ । सवा दुई घण्टाको उद्घाटनसत्रपछि शनिबार दिउँसो बन्दसत्र सुरु हुने प्रवक्ता विश्वप्रकाश शर्माले जानकारी दिए । भेलामा विभिन्न पाँच प्रतिवेदन पेस हुनेछ ।

उपसभापति विमलेन्द्र निधिले राजनीतिक प्रतिवेदन, महामन्त्री शशांक कोइरालाले संगठनसम्बन्धी, अर्का महामन्त्री तथा विधान मस्यौदा समितिका संयोजक पूर्णबहादुर खड्काले पार्टीको नयाँ विधान मस्यौदा प्रतिवेदन, सहमहामन्त्री प्रकाशशरण महतले पार्टीको आर्थिक नीति र कोषाध्यक्ष सीतादेवी यादवले कोष तथा लेखासम्बन्धी प्रतिवेदन प्रस्तुत गर्नेछन् । सबै प्रतिवेदन शनिबारकै सत्रमा पेस हुनेछ ।

 

केन्द्रीय समितिमा सहमति नजुटेको विषय महासमितिमा

भेलामा सहभागी सदस्यको प्रदेशस्तरीय समूह बनाएर छलफल गराइने छ । प्रदेशस्तरीय समूहमा सहभागीको समिति बनेपछि पुस १ देखि प्रतिवेदनमाथि छलफल हुनेछ । मंसिर ९ देखि जारी कांग्रेस केन्द्रीय समिति बैठकले भेलामा पेस गरिने पाँच प्रतिवेदन पारित गर्दै लैजानुपर्ने हो ।

तर केन्द्रीय समितिले पारित गर्न नसकेपछि असहमतिका बुदामा महासमिति बैठकमै छलफल गरिनेछ । विधान मस्यौदा पेस भएपछि मंसिर १३ देखि  केन्द्रीय समिति बैठकमा निरन्तर छलफल गरेको थियो । सहमहामन्त्री डा. प्रकाशशरण महतको आर्थिक नीति मात्र पारित भएको छ । कोषाध्यक्ष यादवले पार्टीको कोष तथा लेखासम्बन्धी प्रतिवेदन पेस गरेकी छन् । यसअघि बैठकमा उपसभापति निधि, महामन्त्रीद्वय कोइराला र खड्काले समेत आआफ्ना प्रतिवेदन पेस गरिसकेका छन् ।

भेला सुरु हुनै लाग्दासमेत केन्द्रीय समितिले प्रतिवेदन पारित गर्न सकेको छैन । पारित नभएका विषयमा महासमितिकै छलफल गरिनेछ । विधान मस्यौदामा पार्टीका शीर्ष नेताबीच असहमति देखिएपछि केन्द्रीय समितिले पारित गर्न नसकेको महामन्त्री तथा विधान मस्यौदा समितिका संयोजक खड्काले बताए ।

महासमिति भेलाको दुई तिहाईले पार्टीको नयाँ विधान पारित गर्नुपर्ने भएकाले सभापति शेरबहादुर देउवा विधान मस्यौदामा सहमति गराउन अनौपचारिक प्रयास जारी राखेका छन् ।

 

१६ सय प्रतिनिधि सहभागी

महासमिति भेलामा १६ सय प्रतिनिधि सहभागी छन् । २ सय ४० वटा निर्वाचन क्षेत्र, केन्द्रीय समिति, भ्रातृसंगठन तथा शुभेच्छुक संघसंस्था तथा जनसम्पर्क समितिका तर्फबाट आउने प्रतिनिधिको संख्या १ हजार ६ सयभन्दा बढी छ ।

राष्ट्रियसभा एवं प्रतिनिधिसभाका २६ सांसद र २९ जिल्ला सभापति पर्यवेक्षकका रूपमा सहभागी हुनेछन् ।

 

एक करोड खर्च

महासमिति भेलामा एक करोड हाराहारीमा रकम खर्च हुने आँकलन गरिएको छ । २०४६ यता कांग्रेसको ६ पटक महासमिति बैठक बसेको छ । २०४८ सालमा तत्कालीन सभापति कृष्णप्रसाद भट्टराईका पालामा दुई पटक र गिरिजाप्रसाद कोइराला पार्टी सभापति भएपछि तीन पटक महासमिति बसेको थियो । सुशील कोइराला सभापति हुँदा २०६९ चैतमा महासमिति बसेको थियो । त्यसयता महासमिति बैठक बस्न सकेको छैन ।

 

महासमिति कार्यतालिका

  • बैठक शुक्रबार दिउँसो ३ बाट नामावली दर्ता
  • उद्घाटन समारोह शनिबार बिहान ११ बजे
  • बन्द सत्र शनिबार ३ बजे
  • बन्द सत्र पुस १, २ र ३ गतेसम्म