नेपाली कृषिउपजलाई सीधा बजार पहुँच दिन कतारसँग महासंघको माग
वि.सं.२०७५ कात्तिक १४ बुधवार १८:३४
shares

नेपाल उद्योग वाणिज्य महासंघकी अध्यक्ष भवानी राणाले निर्यात सम्भावना भएका कृषिउपजमा नेपाल र कतारबीच सहकार्य गरेर अघि बढ्नुपर्ने बताएकी छन् । राष्ट्रपति विद्यादेवी भण्डारीको चारदिने राजकीय भ्रमणका क्रममा निजी क्षेत्रको नेतृत्व गर्दै कतार पुगेकी राणाले अहिले धेरथोर निर्यात हुँदै आइरहेको कृषिउपजलाई अझ बढवा दिन नेपाल र कतार सरकार मिलेर अघि बढ्नुपर्ने बताइन् ।
राजकीय भ्रमणमा रहेकी राष्ट्रपति भण्डारीसमक्ष कृषि र खाद्य सुरक्षा क्षेत्रमा सहकार्यसम्बन्धी एक समझदारी पत्रमा हस्ताक्षर भएको छ । त्यसैगरी, राणाले समझदारीमा उल्लेख भएको माछा, पशुपालन र कृषिमा सहकार्य गर्न सरकारले पहल गर्नुपर्ने बताइन् । नेपालबाट निर्यात सम्भावना रहेका अलैंची र अदुवाजस्ता व्यावसायिक बाली भारत र भारतकै बाटो भएर तेस्रो मुलुक गइरहेकोमा कतारले तिनलाई आफ्नो बजारमा सिधै पहुँच दिनुपर्ने महासंघको भनाइ छ ।
अध्यक्ष राणाले नेपालले श्रमिक पठाउने देशको रुपमा बनेको आफ्नो परिचय बदल्नुपर्ने बताइन् । ‘कतारको अहिले नेपालमा म्यानपावरको व्यवसायमात्र छ, जसलाई हामीले फेर्न खोजिराखेका छौं । नेपालमा अहिले सरकारसमेत स्थिर रहेको र लक्ष्य आर्थिक समृद्धि भएकैले अन्य क्षेत्रमा लगानी बढाउन आग्रह गरिरहेका छौं,’ उनले भनिन् ।

























