निर्मला पन्तका बाबुआमा धर्नामा बस्दै
वि.सं.२०७५ कात्तिक २५ आइतवार १४:२९
shares

कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको आज एक सय ९ दिन पुगेको छ ।
निर्मलाका परिवार भने लामो समयसम्म न्याय नपाएको भन्दै अनशनमा बस्ने भएका छन् । जिल्ला प्रशासन कार्यालय कञ्चनपुरअघि निर्मलाका बाबुआमले आजदेखि अनशनमा थाल्ने भएका छन् । अनशन ११ बजे सुरु हुने बताइएको छ ।
‘निर्मलाको हत्या भएको यत्तिका समय भयो तर सरकारले दोषी पत्ता लगाइदिएन । अब हामी जिल्ला प्रशासन कार्यालयअगाडि अनशन बस्छौ,’ निर्मलाका बाबु यज्ञराजले भने । सरकारले न्याय दिन सक्दैनौ भने मात्र आफूहरु चुप लागेर बस्ने उनको भनाइ छ । उनले भने, ‘हामीलाई न्यायको आस मरेको छैन, कि न्याय देउ कि सक्दैनौ भन ।’
सरकारले निर्मलाको हत्यापछि घोषणा गरेको क्षतिपूर्ति रकम समेत उनका आमाबाबुले लिएका छ्रैनन् । हत्यामा संलग्न पत्ता लगाउनुको साटो उल्टै पैसाको प्रलोभन देखाएको निर्मलाका बाबु यज्ञराजको भनाइ छ । कञ्चनपुरका सहायक सिडियो शंकर विष्टले निर्मलाका परिवारलाई दसैंको समयमा सरकारले घोषणा गरेको पैसा लिन आग्रह गरेका थिए । तर निर्मलाका बाबुले पैसा चाहिन्न हत्यामा संलग्नलाई पहिले पत्ता लगाइदिनुस् भनेका थिए ।
सरकारले निर्मला हत्या विषयमा गृह मन्त्रालयका सहसचिव हरिप्रसाद मैनालीको नेतृत्वमा समिति गठन गरी छानबिन गरेको थियो । समितिले प्रतिवेदन गृहमन्त्रीलाई बुझाएर सोही आधारमा तत्कालिन एसपी विष्ट निलम्बनमा पर्नुबाहेक कुनै ठोस उपलब्धी भने हासिल भएन ।
तत्कालिन प्रहरी प्रहरी प्रमुख, एसपी डिल्लीराज विष्ट नेतृत्वको प्रहरी अनुसन्धानले मानसिक सन्तुलन ठिक नभएका दिलिप बिष्टलाई अपराधी करार गरे पनि डिएनए परीक्षणमा उनी निर्दोष देखिए । साथै एसपी विष्ट प्रमाण नष्ट गरेको र दोषी लुकाउन भूमिका खेलेको अभियोगमा निलम्बनमा परिसकेका छन् । तर, न त निर्मलाका हत्याराबारे प्रहरी अनुसन्धान परिणममुखी छ न त सरकार जिम्मेवार ।
गत साउन १० गते साथिको घर जान भन्दै हिँडेकी निर्मलाको शव भोलिपल्ट उखुबारीमा भेटिएको थियो ।

























