झण्डै एक महीनादेखि नबसेको नेपाल कम्युनिस्ट पार्टी (नेकपा)को सचिवालय बैठकको तयारीका लागि पार्टीका दुई अध्यक्षले छलफल गर्दैछन् । बिहीबार तय भएको सचिवालय बैठकको एजेण्डाको विषयमा प्रधानमन्त्री केपीशर्मा ओली र पुष्पकमल दाहालबीच छलफल हुन लागेको हो ।

प्रदेश कमिटीको पूर्णता, जिल्ला कमिटीको गठन, जनसङ्गठनको एकता, स्थायी समिति बैठकको मिति तथा कार्यसूची र पार्टी, संसद् तथा सरकारको समीक्षा, केन्द्रीय कार्यालयको व्यवस्थापनलगायत विषयमा छलफल गर्न दुई अध्यक्षबीच छलफल हुन लागेको प्रधानमन्त्रीको सचिवालयले जनाएको छ ।

पार्टीमा तल्लो तहसम्मको एकता प्रक्रियाले गति नलिएको, स्थायी कमिटीको बैठक नबसेको तथा सरकार र दलबीच समन्वय नभएको विषयमा आवाज उठ्दै आएको छ । यसबारेमा पनि दुई अध्यक्षबीच छलफल हुनेछ । यसबीचमा प्रधानमन्त्री एवं पार्टी अध्यक्ष केपी शर्मा ओलीको अस्वस्थता तथा तिहार र छठ पर्व परेकाले बैठक पर सरेको हो ।

नेकपाको पछिल्लो सचिवालय बैठक गत कात्तिक ८ गते बसेको थियो । सो बैठकले केन्द्रीय सदस्यको कार्यविभाजन र प्रदेश कमिटीको पूर्णताका लागि सिफारिश गर्न महासचिव विष्णुप्रसाद पौडेल र गृहमन्त्री तथा नेकपाका सचिवालय सदस्य रामबहादुर थापा रहेको कार्यदल गठन गरेको थियो ।