टेलिमकको ५५ प्रतिशत लाभांश पारित
वि.सं.२०७५ माघ १ मंगलवार १४:१६
shares

नेपाल दूरसञ्चार कम्पनीको एघारौं वार्षिक साधारणसभाले आर्थिक वर्ष २०७४/७५ को नाफाबाट ५५ प्रतिशत नगद लाभांश वितरण गर्ने प्रस्ताव सर्वसम्मतले पारित गरेको छ । सञ्चालक समितिको लाभांश बाँड्ने निर्णय साधारणसभाले पारित गरेको हो ।
त्रिभुवन आर्मी अफिसर्स क्लब, काठमाडौंमा सम्पन्न साधारण सभामा ९१ प्रतिशतभन्दा बढी शेयरधनीको उपस्थिति थियो । सभाले आर्थिक वर्ष २०७४/७५ को लागि सञ्चालक समितिको प्रतिवेदन र लेखापरीक्षकको प्रतिवेदनसहितको २०७५ असार मसान्तको वासलात तथा सोही मितिमा समाप्त हुने आर्थिक वर्ष २०७४/७५ को नाफा नोक्सान हिसाब तथा सोही अवधिको नगद प्रवाह विवरणलाई छलफल गरी सर्वसम्मतले पारित गरेको छ ।

यसैगरी, साधारणसभाले महालेखा परीक्षकको कार्यालयको परामर्श तथा लेखापरीक्षण समितिको सिफारिसबमोजिम आव २०७५/७६ को लागि कम्पनीको लेखा परीक्षण गर्न चार्टर्ड एकाउण्टेण्ट अच्युतराज जोशी र प्रकाशजङ थापालाई लेखापरीक्षक नियुक्त गर्नुका साथै निजको पारिश्रमिक समेत पारित गरेको छ ।
कम्पनीको सञ्चालक समितिका अध्यक्ष एवं सूचना तथा सञ्चार मन्त्रालयका सचिव महेन्द्रमान गुरुङले साधारणसभामा कम्पनीको एघारौं वार्षिक प्रतिवेदन पेस गरेका थिए । प्रतिवेदन पेस गर्दै उनले अगामी दिनमा अझ बढी ग्राहकमुखी सेवा प्रदान गरी मुलुकको अग्रणी दूरसञ्चार सेवाप्रदायकको रुपमा रहिरहने प्रतिबद्धता व्यक्त गरे । २०७५ असारसम्ममा मुलुकमा कम्पनीको भ्वाइस सेवामा बजार हिस्सा ५०.९ प्रतिशत र ब्रोडब्यान्ड डाटा सेवामा बजार हिस्सा ४३.६ प्रतिशत पुगेको उनले जानकारी दिए ।

























