धनुषामा करेन्ट लागेर दुई जनाको घटनास्थमै मृत्यु
वि.सं.२०७५ माघ ५ शनिवार २३:४३
shares

जनकपुरधाम उपमहानगरपालिकामा करेन्ट लागेर दुई जनाको मृत्यु भएको छ । जनकपुरधाम उपमहानगरपालिका–१२, नारी विकास केन्द्रअगाडि विद्युत पोलबाट प्रवाह भएको करेन्ट लागेर उनीहरूको मृत्यु भएको हो ।
स्थानीय प्रत्यक्षदर्शी श्रवण साहका अनुसार तीनवटा बेग्लाबेग्लै मोटरसाइकल चढेर आएका उनीहरु सडकपेटीमै विद्युतको पोलमा सपोर्टका लागि राखिएको तारबाट प्रवाह भइरहेको करेन्टमा परेका थिए । करेन्ट लागेका एकजनालाई बचाउन खोज्दा अर्को एकजनाको पनि ज्यान गएको प्रहरीले जनाएको छ ।
मृत्यु हुनेहरुमा सिरहाको विष्णुपुर नगरपालिका–४ बस्ने रामअवतार साहका २७ वर्षीय छोरा जगरनाथ साह र धनुषाको मिथिलाबिहारी नगरपालिका–९, मिथिलेश्वरका परमेश्वर मण्डल छन् । करेन्ट लागेर जनकपुरधाम उपमहानगरपालिका–४ बस्ने ४१ वर्षका सूर्यनारायण शर्मा घाइते भएका छन् । घटनास्थलबाट करेन्ट प्रवाह भएको मोटरसाइकल ज. ९ प ७७०९, ज. ९ प ३५२० र स. ४ प ३९५६ प्रहरी कार्यालयमा राखिएको छ ।
मृतकहरुको शव पोस्टमार्टमका लागि जनकपुर अञ्चल अस्पतालमा राखिएको छ । घाइते शर्माको अञ्चल अस्पतालमै उपचार भइरहेको जिल्ला प्रहरी कार्यालय धनुषाले जनाएको छ । घटनास्थल पुगेका प्रहरीका अनुसार ११ हजार भोल्टको तार तानिएको पोलबाट सपोर्टका लागि जमिनमा गाडिएको तारबाट करेन्ट प्रवाह भएको हो ।

























