वल्भ्समाथि रोमान्चक जित निकाल्दै वाटफर्ड एफए कपको फाइनलमा प्रवेश गरेको छ । इन्ज्युरी समयमा कप्तान ट्रोए डिनीले बराबरी गोल गरेपछि अतिरिक्त समयमा पुगेको खेलमा वल्भ्स ३–२ गोलले पराजित भएको हो ।

आइतबार वेम्बमा भएको खेलमा वल्भ्सले ३६ औं मिनेटमा जाभिएर डोहर्टिको गोलबाट अग्रता लिएको थियो । दोस्रो हाफमा राउल जिमिनेजले अग्रता दोब्बर पारे । सन् १९६० पछि पहिलो पटक फाइनल पुग्ने सम्भावना देखाएको वल्भ्सले अन्तिम समयमा सम्हिलन नसक्दा पराजय भोग्नुपर्यो । खेल सकिन ११ मिनेट बाँकी हुँदा जेरार्ड डेउलोफेउले गोल गर्दै वाटफर्डको खेलमा फर्कने आशा बनाए । इन्ज्युरी समयको चौथौं मिनेटमा कप्तान डिनीले पेनाल्टीमार्फत गोल गरे ।

अतिरिक्त समयको १ सय ४ औं मिनेटमा डेउलोफेउले नै गोल गर्दै वाटफर्डलाई जितको बाटो देखाए । सन् १९८४ यता पहिलो पटक फाइनलमा स्थान बनाएको वाटफर्डले अब उपाधिका लागि म्यानचेस्टर सिटीसँग प्रतिस्पर्धा गर्नेछ । खेल मे १८ मा वेम्बलीमै हुनेछ ।

प्रकाशित समय : १३:५७ बजे