विराटनगर भन्सार कार्यालयले चालू आर्थिक वर्षको चैत मसान्तसम्ममा ९४ प्रतिशत राजस्व संकलन गरेको छ । कार्यालयले चालू आर्थिक वर्षको ९ महिनामा ३० अर्ब ६२ करोड २९ लाख ८२ हजार रुपैयाँ लक्ष्य लिएकोमा ९४.३७ प्रतिशत अर्थात् २८ अर्ब ८९ करोड ९३ हजार रुपैयाँ राजस्व संकलन गरेको हो, जुन लक्ष्यभन्दा करिब ६ प्रतिशत र गत वर्षको तुलनामा करिब ५ प्रतिशत कम हो । गत वर्षको सोही अवधिमा कार्यालयले लक्ष्यको ९९.३४ प्रतिशत अर्थात् २२ अर्ब ३४ करोड ८५ लाख ७७ हजार रुपैयाँ राजस्व संकलन गरेको थियो ।

भन्सार कार्यालयले चालू आर्थिक वर्षको साउनमा २ अर्ब ९७ करोड, भदौमा ३ अर्ब ७ करोड, असोजमा ३ अर्ब ९७ करोड, कात्तिकमा ३ अर्ब १५ करोड, मंसिरमा ३ अर्ब १९ करोड, पुसमा ३ अर्ब १६ करोड, माघमा २ अर्ब ७३ करोड, फागुनमा ३ अर्ब १५ करोड र चैतमा ३ अर्ब ४३ करोड राजस्व संकलन गरेको छ ।

लक्ष्य भेट्टाउँछौँ : सूचना अधिकारी पौडेल
विराटनगर भन्सार कार्यालयका सूचना अधिकारी पौडेलले चालू आर्थिक वर्षको चैत मसान्तसम्ममा राजस्व संकलन सन्तोषजनक रहेको बताए । बाँकी तीन महिनामा लक्ष्यअनुसार राजस्व संकलन हुने उनको विश्वास छ । ‘अझै तीन महिना बाँकी नै छ, दैनिक राजस्व संकलन राम्रै छ । हुँदैन कि भनेर आत्तिइहाल्नुपर्ने अवस्था छैन,’ उनले भने ।

चोरीनिकासीका ३७९ मुद्दा
विराटनगर भन्सार कार्यालयले चालू आर्थिक वर्षको चैत मसान्तसम्ममा चोरी निकासी पैठारीका ३ सय ७९ वटा मुद्दा दर्ता गरेको छ । भन्सार गस्तीबाट १३ वटा मुद्दा दर्ता भएकोमा ४ लाख ८ हजार रुपैयाँ मूल्यबराबरको अवैध सामान वरामद भएको छ । त्यस्तै, सशस्त्र प्रहरी भन्सार राजस्व गस्ती टोलीद्वारा दर्ता गरिएको १ सय ३३ वटा मुद्दामा ९८ लाख ३८ हजार रुपैयाँ र सशस्त्र प्रहरी बलद्वारा दर्ता भएका २ सय ३३ वटा मुद्दामा १ करोड १३ लाख ८१ हजार रुपैयाँ मूल्यबराबरका सामान वरामद भएको सूचना अधिकारी पौडेलले जानकारी दिए ।

१० वस्तु ४९ अर्बको आयात, १५ अर्बको निर्यात
चालू आर्थिक वर्षको चैत मसान्तसम्ममा विराटनगर भन्सार नाका भएर ४९ अर्ब २ करोड ४९ लाख ६५ हजार रुपैयाँ मूल्यका उत्कृष्ट १० वस्तु आयात भएका छन् । त्यस्तै, १५ अर्ब ४५ करोड ३४ लाख ६४ हजार उत्कृष्ट १० वस्तु निर्यात भएका छन् ।

कार्यालयका अुनसार १० अर्ब ६२ करोड मूल्यबराबरको १ लाख ५२ हजार २ सय ६८ किलोलिटर हाइस्पिड डिजेल, ७ अर्ब ९४ करोड ३४ लाख मूल्यबराबरको १३ करोड ९५ लाख ९४ हजार ७७९ किलो एमएस बिलेट, ३ अर्ब ८३ करोड १७ लाख ९ हजार मूल्यबराबरको ३८ करोड ६२ लाख १ हजार ६८३ थान तयारी कपडा, २ अर्ब ९२ करोड ४७ लाख ६२ हजार मूल्यको ४६ हजार ३४४ किलोलिटर पेट्रोल आयात भएको भन्सार कार्यालयका सूचना अधिकारी पौडेलले जानकारी दिए ।

समीक्षा अवधिमा ५ अर्ब ६६ करोड मूल्यबराबरको ३ करोड ८५ लाख १६ हजार १६० किलो पोलिथिन दाना, ४ अर्ब ८३ करोड ९२ लाख ९९ हजार रुपैयाँबराबरको ६ करोड ४५ लाख ८५ हजार ४०४ किलो सीआर सिट, ५ अर्ब ४१ करोड ९१ लाख १ हजार रुपैयाँबराबरको स्टिल वायर रड इन क्वायल र एमएस आयात भएको छ ।

सो अवधिमा ३ अर्ब ४२ करोड १८ लाख १ हजार रुपैयाँबराबरको एलपी ग्यास, ३ अर्ब १५ करोड २० लाख ८२ हजार रुपैयाँको एचआर सिट, १ अर्ब २० करोड ३१ लाख १७ हजार मूल्यबराबरको सिमेन्ट क्लिंकर आयात भएको भन्सार कार्यालयको तथ्यांकमा उल्लेख छ ।

१५ अर्बको निर्यात
चालू आवको चैतसम्ममा विराटनगर भन्सार नाका भएर भारतलगायत तेस्रो मुलुक १५ अर्बका १० बस्तु (बढी निर्यात हुने) निर्यात भएको छ । सो अवधिमा ३ अर्ब ४१ करोड २२ लाख ९८ हजार मूल्यको सेन्थेटिक यार्न, २ अर्ब ४२ करोड ७५ लाख ९० हजार मूल्यको खजुरको प्रशोधित तेल, २ अर्ब ९० लाख २४ हजार रुपैयाँ मूल्यको जुटका बुनिएका कपडा, १ अर्ब ७६ करोड २४ लाख २१ हजारको जुटका बोरा झोला, १ अर्ब ३८ करोड १३ लाख ३९ हजारको रेसाको कपडा, १ अर्ब २ लाख २० हजार रुपैया मूल्यको अलैँची, ६५ करोड ७३ लाख ४९ हजारको जस्तापाता, ६३ करोड २४ लाख २ हजारको कपर सिट र ५८ करोड ५५ लाख १० हजार रुपैयाँबराबरको पिना निर्यात भएको तथ्यांक छ ।

प्रकाशित समय : १९:३७ बजे