काठमाडौं । रास्वपा सांसद खगेन्द्र सुनारले बागमती प्रदेशकी पूर्वराज्यमन्त्रीलाई दिएको ज्यान मार्ने धम्की, गालीगलौज र पैसा असुल्ने अडियो एआईबाट निर्मित भएको दाबी गरेका छन् ।

सोमबार दिउँसोदेखि सामाजिक सञ्जालमा सुन्नै नसकिने खगेन्द्र सुनारको अडियो सार्वजनिक भएपछि उनीमाथि कारबाही गर्नुपर्ने भन्दै सरकार र रास्वपालाई चौतर्फी दबाब परेको छ । रास्वपाले सुनारलाई घटनाको निरुपण नभएसम्म सार्वजनिक कार्यक्रममा रोक लगाएको छ ।

रास्वपा अनुशासन आयोगले सुनारलाई २४ घन्टाभित्र लिखित जवाफ पेस गर्न पत्र काटेपछि तराईको अज्ञातस्थलबाट सुनारले भिडियो खिचेर सामाजिक सञ्जालमार्फत भिडियो काल्पनिक महिला र एआई निर्मित भएको दाबी गरेका छन् ।

सुनारले बोलेका पाँच पाँचवटा सक्कली अडियो नै धेरै ठाउँमा म्युट, बीप र एडिट नगरी सुन्नै नसकिने खालका छन् । ठेट नेपाली गालीसहित ज्यान मार्ने धम्की दिइएको छ । जबकि एआईले कसैलाई ज्यान मार्ने र महिला हिंसाको समर्थनसमेत गर्दैन । तर पनि सुनारले बडो कन्फिडेसनका साथ अडियोलाई एआई निर्मित र नक्कली भन्न भ्याइसकेका छन् ।

सोमबार रातिसम्म सुन्नै नसकिने र अश्लील भएको टिप्पणी गर्ने रास्वपा सांसद ज्वाला संग्रौलाले अहिले बोली फेरेकी छन् । तर रास्वपा महामन्त्री विपिनकुमार आचार्य, सचेतक प्रकाशचन्द्र परियारले भने सुनारलाई माफी गर्न नसकिने बताइसकेकमा छन् ।