काठमाडौं । नेपाली कांग्रेसका नेता एवम मेडिकल व्यवसायी डा.सुनील शर्माले पार्टीको १५औँ महाधिवेशनमा महामन्त्री पदमा उमेदवारी दिने भएका छन् ।

मोरङ–३ बाट अत्यधिक बहुमतसहित केन्द्रीय महाधिवेशन प्रतिनिधिमा निर्वाचित डा.शर्माले शनिवार पत्रकार सम्मेलनको आयोजना गर्दै महामन्त्री पदमा उम्मेदवारी दिने जानकारी दिएका हुन् ।

यसअघि नै डा. शर्मा कांग्रेसको १५औँ महाधिवेशनमा महामन्त्री पदमा उम्मेदवार बन्ने तयारीमा रहेको चर्चा हुँदै आएको थियो ।

पार्टीको नयाँ नेतृत्व र पदाधिकारी चयनलाई लिएर बहस चलिरहेका बेला शर्माले महामन्त्री पदमा आफ्नो उम्मेदवारी रहने घोषणा गरेका हुन् ।

स्वास्थ्य, शिक्षा र सामाजिक सेवाका क्षेत्रमा सक्रिय रहँदै आएका डा.शर्माले बदलिँदो राजनीतिक परिस्थितिमा पार्टीलाई जनतासँग प्रत्यक्ष जोड्ने संकल्पसमेत गरेका छन् ।

शर्मा नेपाली कांग्रेसको राजनीतिमा २०५४ सालदेखि सक्रिय छन्। १३औँ महाधिवेशनदेखि महासमिति सदस्य रहँदै आएका उनले कांग्रेस पार्टीलाई दूरदराजका नागरिकसँग जोड्दै सामान्य मानिसका समस्या र आवश्यकतालाई राजनीतिको केन्द्रसँग जोडेर काम गर्ने पनि बताए ।

प्रकाशित समय : २०:३१ बजे