जनकपुरधाम । जनप्रतिनिधि र कर्मचारीमाथि हातपात तथा कार्यालयमा तोडफोड भएको भन्दै महोत्तरीको औरही नगरपालिकाले अत्यावश्यकबाहेकका सम्पूर्ण सेवा अनिश्चितकालका लागि बन्द गरेको छ ।

बुधबार बिहान करिब ११ः३० बजे केही व्यक्तिहरू नगर प्रमुख प्रदीपकुमार खड्काको कार्यकक्षमा प्रवेश गरी हुलहुज्जत गर्दै हातपात तथा कार्यालय परिसरमा तोडफोड गरेको कारण पालिकाको सम्पूर्ण सेवा ठप्प गरिएको नगरपालिकाले जनाएको छ । घटनामा अन्य जनप्रतिनिधि तथा कर्मचारीमाथि समेत हातपात र अभद्र व्यवहार भएको नगरपालिकाको दाबी छ ।

घटना पश्चात नगरपालिकाका कर्मचारीहरूले एक प्रेस विज्ञप्ति जारी गरी गुनासो तथा असमझदारी भए संवादमा मार्फत सुल्झाउनुपर्नेमा त्यसो नगरी हातपात तथा तोडफोड गर्नुले विधिको शासन र कानुनी प्रक्रियाको उपहास रहेकाले यस्ता अमर्यादित कार्य रोक्न माग अघि सारेका छ्न् ।

तोडफोडका कारण सार्वजनिक सम्पत्तिमा क्षति पुगेको तथा जनप्रतिनिधि र कर्मचारीको सुरक्षामा समेत प्रश्न उठेको भन्दै नगरपालिकाले घटनाप्रति गम्भीर आपत्ति जनाएका छन् । यस्ता घटनाले सेवामा खटिने कर्मचारीको मनोबलमा समेत असर परेको विज्ञप्तिमा भनिएको छ ।

नगरपालिकाले घटनामा संलग्न व्यक्तिहरूको पहिचान गरी प्रचलित कानुनबमोजिम अनुसन्धान तथा कारबाही गर्न र तोडफोडबाट भएको सार्वजनिक सम्पत्तिको क्षति सम्बन्धित पक्षबाट भराउन सम्बन्धित निकायसँग माग गरेको छ ।

यसका साथै, कर्मचारी तथा जनप्रतिनिधिको पूर्ण सुरक्षाको प्रत्याभूति नभएसम्म औरही नगरपालिका तथा मातहतका कार्यालयबाट प्रवाह हुने अत्यावश्यक बाहेकका सम्पूर्ण सेवा अनिश्चितकालका लागि बन्द गरिएको नगरपालिकाले विज्ञप्तिमा उल्लेख गरेको छ ।

घटनाबारे जिल्ला प्रशासन कार्यालय महोत्तरी, गृह मन्त्रालय तथा भूमि व्यवस्था, सहकारी तथा संघीय मामिला तथा सामान्य प्रशासन मन्त्रालयलाई समेत कर्मचारीले जानकारी गराइसकेका छन् ।