काठमाडौँ । वालेन्द्र शाह नेतृत्वको सरकार गठन भएपश्चात सरकारी कार्यालयहरूमा अनुशासन कायम गर्ने तथा जनगुनासो सुनुवाइको प्रक्रियाले तीव्र गतिमा अगाडि बढेको छ ।प्रधानमन्त्री तथा मन्त्रिपरिषद्को कार्यालय अन्तर्गतको राष्ट्रिय सतर्कता केन्द्रको तथ्यांक अनुसार, गत चैतदेखि साउनसम्मको अवधिमा केन्द्रमा दर्ता भएका कुल एक हजार २९८ उजुरीमध्ये एक हजार ११४ वटा (८५.८२ प्रतिशत) उजुरी फछ्र्यौट भएका छन्। यो प्रगति अघिल्लो वर्षको सोही अवधिको तुलनामा ११.७२ प्रतिशत विन्दुले बढी हो। यसअघि विसं २०८१ चैतदेखि २०८२ साउनसम्म ५५६ उजुरी दर्ता भएकामा ४१२ वटा (७४.१० प्रतिशत) मात्र उजुरी फछ्र्यौट भएका थिए।

सार्वजनिक सेवा प्रवाहमा लामो समयदेखि देखिएको ढिलासुस्ती र अनुशासनहीनता अन्त्य गर्न प्रधानमन्त्री शाहको कडा निर्देशनपछि सतर्कता केन्द्रले कार्यालय अनुगमन तथा कारबाहीलाई अझ व्यापक बनाएको छ। पछिल्लो समीक्षा अवधिमा जम्मा ३१८ वटा कार्यालयहरूको अनुगमन गरिएकोमा आचारसंहिता तथा समय पालना नगर्ने २ हजार २१३ जना र तोकिएको पोशाक नलगाएका ५६२ जना गरी कुल २ हजार ७७५ जना कर्मचारीले अनुशासन उल्लंघन गरेको पाइएको थियो ।तर, गत चैतदेखि साउनसम्म अनुगमन गरिएका कार्यालयहरूको संख्यामा झन्डै तीन गुणाले वृद्धि गरी ९२४ पुर्‍याइएको छ । जसमा आचारसंहिता र समय पालना नगरेका १० हजार २६८ जना, तोकिएको पोशाकमा उपस्थित नभएका ६४५ जना तथा आफ्नो कार्यकक्षमा नभेटिएका ९१ जना गरी ११ हजार चार जना कर्मचारीहरू कारबाहीमा परेका छन् । सतर्कता केन्द्रले अनुशासन उल्लंघन गर्ने यी सबै कर्मचारीहरूलाई प्रचलित कानुन बमोजिम कारबाही गर्न सम्बन्धित निकायहरूलाई कडा निर्देशन दिएको छ ।

केन्द्रले सरकारी सेवालाई नागरिकमैत्री, अनुशासित र मर्यादित बनाउनका लागि सक्रियता बढाएको छ । सरकारी निकायमा भ्रष्टाचार भएको, कर्मचारीले आचारसंहिता पालना नगरेको वा संकास्पद सम्पत्ति रहेको सूचना केन्द्रको हटलाइन नं ०१४२००३४५ मा फोन गरेर टिपाउन सकिन्छ ।

प्रकाशित समय : २१:३० बजे