सुदूरपश्चिम ।सुदूरपश्चिम प्रदेशका मुख्यमन्त्री कमलबहादुर शाहले कृषि क्षेत्रको आधुनिकीकरण, उत्पादन वृद्धि र लागतअनुसार प्रतिफल पाउने अवस्था बनाउनु प्रदेश सरकारको प्रमुख प्राथमिकता भएको बताएको छन् ।

कैलालीको लम्कीचुहा नगरपालिका–४ कौवापुरस्थित किसान बहुउद्देश्यीय सहकारी संस्था लिमिटेडले निर्माण गरेको बीउ प्रशोधन तथा भण्डारण गृहको आज उद्घाटन गर्दै उनले कृषि उद्यमशीलता प्रवर्द्धनका लागि प्रदेश सरकारले नीतिगत सुधारसँगै किसान र कृषि उद्यमीलाई प्रोत्साहन गर्ने विभिन्न कार्यक्रम सञ्चालन गरिरहेको बताए ।

मुख्यमन्त्री शाहले सुदूरपश्चिमका अधिकांश नागरिकको जीविकोपार्जनको आधार कृषि भए पनि निर्वाहमुखी खेती प्रणालीका कारण अपेक्षित प्रतिफल प्राप्त हुन नसकेको बताए ।

उनले उत्पादनसँगै प्रशोधन, भण्डारण र बजारीकरणको सुदृढ व्यवस्थाबाट मात्रै कृषिलाई सम्मानजनक र आम्दानीमुखी पेसाका रूपमा विकास गर्न सकिने धारणा राखे ।

प्रदेश सरकारको लागत साझेदारीमा निर्माण गरिएको बीउ प्रशोधन तथा भण्डारण गृहका लागि भूमि व्यवस्था, कृषि तथा सहकारी मन्त्रालयअन्तर्गतको कृषि विकास निर्देशनालयले मेसिन उपकरणमा १७ लाख १५ हजार र भवन निर्माण २५ लाख अनुदान उपलब्ध भएको छ ।

कुल एक करोड ४२ लाखको परियोजनामा अन्य रकम सहकारी संस्थाले आफ्नो स्रोतबाट लगानी गरेको महाप्रबन्धक डम्बरबहादुर शाहले जानकारी दिए । नवनिर्मित भण्डारण गृह सञ्चालनमा आएपछि स्थानीय किसानले उत्पादन गरेका बीउको प्रशोधन, गुणस्तर संरक्षण र सुरक्षित भण्डारणमा सहजता हुने अपेक्षा गरिएको छ ।

बीउको गुणस्तर कायम राख्दै बजार व्यवस्थापनमा सहयोग पुग्ने र किसानको आम्दानी वृद्धि गर्नसमेत टेवा पुग्ने विश्वास गरिएको महाप्रबन्धक शाहले बताए ।

भण्डारण गृहमा धान, मकै, तोरीलगायत बालीको बीउ संरक्षण गरी किसानको उत्पादन वृद्धिमा प्रयोग गर्ने लक्ष्य छ । हाल लम्किचुहा, बर्दगोरिया, जानकी, भजनीलगायत यहाँका स्थानीय तहमा १५० जना किसानसँगको समन्वयमा १४० बिघामा धानखेती गरिएको छ । किसानको उत्पादन वृद्धि, मूल्य र बजारको सुनिश्चिततामा योगदान पुग्ने विश्वास गरिएको छ ।

प्रकाशित समय : १३:२५ बजे