काठमाडौं । अमेरिकी स्ट्राइकर फोलारिन बालोगुनको रातो कार्ड निलम्बन उल्टाउने फिफाको निर्णयमा अमेरिकी प्रशासनको दबाबले प्रभाव पारेको थियो कि थिएन भन्ने विषयमा अनुसन्धान गर्न युरोपेली संसदमा माग गरिएको छ।

युरोपेली संसदमा प्रसारित एक पत्रमार्फत फिफाको उक्त निर्णय दबाबमा गरिएको हो वा अन्य कारणले भन्ने विषयमा जानकारी माग गरिएको हो।

विश्वकपको ‘राउन्ड अफ १६’ खेलमा खेलेका स्ट्राइकर बालोगुनको रातो कार्ड निलम्बन उल्टाउन अमेरिकी राष्ट्रपति डोनाल्ड ट्रम्पले फिफालाई दबाब दिएको विषय अहिले युरोपेली संसदमा प्रवेश गरेको हो।

अमेरिकी प्रशासनको दबाबले निर्णय प्रक्रियालाई प्रभावित गरेको थियो कि थिएन भन्ने विषयमा फिफा अध्यक्ष जियानी इन्फान्टिनोको भूमिकाको अनुसन्धान गर्न माग गर्दै मंगलबार पहल सुरु गरिएको युरोपेली सञ्चारमाध्यमहरूले जनाएका छन्।

युरोन्युजका अनुसार युरोपेली संघका २७ फुटबल संघलाई सम्बोधन गरिएको पत्रमा बालोगुनको निलम्बन उल्टाउने निर्णय प्रक्रियाको अनुसन्धान गर्न फिफासँग औपचारिक कारबाही गर्न आग्रह गरिएको छ।

पत्रमा भनिएको छ, “हामीलाई लाग्छ कि युरोपेली फुटबल संघहरू, जो सबै फिफाका सदस्य संघ हुन्, ले हस्तक्षेप गर्ने र फिफालाई बालोगुनको मामिलामा निर्णय प्रक्रियाको अनुसन्धान गर्न आग्रह गर्ने समय आएको छ।”

पत्रका प्रवर्द्धकमध्येका एक एमईपी ब्यारी एन्ड्रयूजले युरोन्युजसँग भने, “फेरि एक पटक हामीले इन्फान्टिनो र फिफाले ट्रम्प प्रशासनसामु आत्मसमर्पण गरेको देखेका छौँ। फिफाको निर्णयलाई न्यायको अपमान र विकृति भनेका छौँ।”

गत साता बोस्निया र हर्जगोभिनाविरुद्धको टिम युएसएको खेलमा बालोगुनले विवादास्पद रातो कार्ड पाएका थिए। रातो कार्डका कारण उनले बेल्जियमविरुद्धको खेल वा घरेलु खेलमा एक खेलको निलम्बन भोग्नुपर्ने थियो।

अमेरिकी राष्ट्रपति ट्रम्पले बालोगुनको रातो कार्डका विषयमा इन्फान्टिनोलाई फोन गरेको स्वीकार गरेका थिए। उनले उक्त विषयलाई ‘अनुचित’ बताएका थिए। त्यसपछि फिफाले विवादास्पद कानुनी प्रावधान प्रयोग गर्दै प्रतिबन्ध कार्यान्वयन स्थगित गरेको थियो, जुन रातो कार्ड लागू भएयता विश्वकपमा यसअघि प्रयोग नभएको जनाइएको छ।

रातो कार्ड फिर्ता भएपछि ट्रम्पले इन्फान्टिनोलाई ‘ठूलो अन्याय उल्ट्याएकोमा धन्यवाद’ दिएका थिए। तर फिफा अध्यक्ष इन्फान्टिनोले भने ट्रम्पसँगको फोन वार्ताका क्रममा अनुशासनात्मक निकाय स्वतन्त्र रहेको जानकारी गराएको बताएका छन्।

युरोपेली फुटबलको शासकीय निकायले उक्त निर्णयलाई ‘अभूतपूर्व, बुझ्न नसकिने र अनुचित’ भनेको छ। बेल्जियम फुटबल महासंघले पनि बालोगुनको खेल्न पाउने योग्यताविरुद्ध औपचारिक चुनौती सुरु गरेको छ। उक्त निर्णयले युरोपभर प्रतिक्रिया उत्पन्न गरेको छ।

प्रकाशित समय : ०६:५२ बजे