आज ई.सं. २०२६ जुन १६, नेपाल संवत् ११४६ तछलाथ्व द्वितीया, अधिक ज्येष्ठ शुक्ल पक्ष, जेठ शुक्ल द्वितीयापञ्चाङ्गः वृद्धि, बालव, आर्द्रा । गृष्म ऋतु । चन्द्रमा मिथुन राशिमा र सूर्य पनि मिथुन राशिमै रहेका छन् । योगः गण्ड, करणः बब । आज नेपालमा सूर्योदय बिहान ५ः१० बजे र सूर्यास्त साँझ ६ः५८ बजे हुनेछ ।आज कुनै महत्वपूर्ण कार्यका लागि बाहिर निस्कनु पर्दा तिल खाएर जुनसुकै दिशाको यात्रा गरे पनि शुभ फल प्राप्त हुनेछ । कुनै महत्वपूर्ण कार्यको सुरुआत वा शुभ यात्राका लागि आजको शुभ समय बिहान ६ बजेर १४ मिनेटदेखि ९ बजेर ५७ मिनेटसम्म रहेको छ । यो समय नेपालको राष्ट्रिय समयअनुसार हो ।

मेष (चु, चे, चो, ला, लि, लु, ले, लो, अ)

निर्णय क्षमता बढ्ने दिन छ । कठिन देखिएका कामसमेत सम्पन्न हुने सम्भावना छ । व्यक्तित्व विकासमा सकारात्मक प्रभाव पर्नेछ भने आफन्त तथा सहकर्मीसँगको सम्बन्ध अझ सुदृढ बन्नेछ । विवाद वा मतभेद देखिएको अवस्थामा पनि समाधानको बाटो भेटिनेछ । अतिरिक्त आम्दानीका लागि व्यवसाय, पेशा वा नोकरी परिवर्तनबारे सोच्दै हुनुहुन्छ भने अनुभवी व्यक्तिको सल्लाह लिएर अघि बढ्नु राम्रो हुनेछ । अविवाहित हुनुहुन्छ भने आज कुनै विशेष व्यक्तिसँग परिचय हुन सक्छ, जसले जीवनमा नयाँ उत्साह थप्न सक्छ ।

वृष (इ, उ, ए, ओ, बा, बि, बु, बे, बो)

आत्मविश्वास र मनोबल बढ्ने समय छ । प्रतिस्पर्धी वा विरोधीका कारण केही चुनौतीहरू थपिन सक्ने भए पनि अहिलेको मेहनतले निकट भविष्यमा राम्रो परिणाम दिनेछ । आम्दानी बढ्ने सम्भावना छ । प्रशासनिक वा व्यवस्थापकीय कामका लागि अनुकूल समय रहेको छ । तामा तथा रातो वस्तुसँग सम्बन्धित कारोबारमा लाभ देखिन्छ । नयाँ स्थानको भ्रमण वा नयाँ कार्य प्रारम्भ गर्ने अवसर मिल्न सक्छ । घरमै बसे पनि भविष्यका लागि आवश्यक वस्तुको व्यवस्थापनमा ध्यान जानेछ ।

मिथुन (का, कि, कु, घ, ङ, छ, के, को, ह)

अल्छीपन र शारीरिक थकानका कारण काममा अपेक्षित गति नआउन सक्छ । मानसिक शान्ति र विश्रामप्रति आकर्षण बढ्नेछ । एकाग्रतामा कमी आउनाले एउटै विषयमा ध्यान केन्द्रित गर्न कठिन हुन सक्छ । बाहिरबाट सामान्य देखिए पनि मनभित्र विभिन्न भावनाहरू चलिरहनेछन् । अत्यधिक महत्त्वाकांक्षा राख्दा व्यावहारिक समस्या तथा आलोचनाको सामना गर्नुपर्ने हुन सक्छ । कतिपय अवस्थामा सुरु गरेको काम बीचमै रोक्नुपर्ने परिस्थिति बन्न सक्छ ।

कर्कट (हि, हु, हे, हो, डा, डि, डु, डे, डो)

भावनात्मक निकटता बढ्ने दिन छ । प्रेम सम्बन्ध अझ गहिरो बन्ने सम्भावना छ र प्रिय व्यक्तिबाट उपहार प्राप्त हुन सक्छ । आफन्त वा साथीभाइको आगमन हुँदा स्वागत-सत्कारमा समय बित्नेछ । यस्ता भेटघाटले नयाँ अवसर पनि दिलाउन सक्छन् । रोकिएका कामहरू पुनः सुरु गर्ने समय अनुकूल छ । खर्च बढे पनि विगतको लगानीबाट लाभ प्राप्त हुने सम्भावना छ ।

सिंह (मा, मि, मु, मे, मो, टा, टि, टु, टे)

कामको चाप बढ्नेछ र साना कामसमेत आफैंले सम्हाल्नुपर्ने अवस्था आउन सक्छ । आत्मसम्मान र नेतृत्व क्षमता प्रकट हुने दिन हो । निर्णय क्षमता प्रभावकारी रहनेछ । आफ्नो सीप र योग्यताको उचित मूल्याङ्कन हुनेछ । पेशा, व्यवसाय वा अध्ययनका विषयमा दीर्घकालीन योजना बनाउन उपयुक्त समय छ । सकारात्मक समाचार प्राप्त हुँदा उत्साह बढ्नेछ । सामान्य प्रयासले पनि मान-सम्मान तथा ठूलाबडाको सद्भाव प्राप्त हुनेछ । प्रयास गरेमा असम्भवजस्तै देखिएका काम पनि सफल हुन सक्छन् ।

कन्या (टो, प, पि, पु, ष, ण, ठ, पे, पो)

सम्भावना र उपलब्धिले भरिएको दिन छ । सानो प्रयासले पनि राम्रो नतिजा तथा सम्मान प्राप्त गर्न सकिनेछ । नयाँ काम सुरु गर्न अनुकूल समय रहेको छ र त्यसले सकारात्मक दिशा लिनेछ । सही समय र उचित अवसरको सदुपयोग गर्न सके सफलता हात लाग्नेछ । नयाँ विषयको अनुभव प्राप्त हुँदा कार्यशैलीमा सुधार आउनेछ । वरिष्ठ कर्मचारी वा अनुभवी व्यक्तिको सहयोगले जटिल समस्या समाधान गर्न सकिनेछ ।

तुला (र, रि, रु, रे, रो, ता, ति, तु, ते)

कुनै पनि व्यक्तिलाई सहजै विश्वास नगर्नु राम्रो हुनेछ । कार्यक्षेत्र वा व्यवसायमा केही चुनौतीहरू देखा पर्न सक्छन् । स्वास्थ्यमा समस्या छ भने आरामका लागि समय निकाल्नु आवश्यक छ । खनिज पदार्थ तथा पुरातात्त्विक वस्तुसँग सम्बन्धित व्यवसायमा लाभ हुने सम्भावना छ । अस्वस्थताका बाबजुद पनि काममा सक्रिय रहनुपर्ने परिस्थिति आउन सक्छ । स्वास्थ्य सुधारका लागि पौष्टिक आहार र पर्याप्त विश्राममा ध्यान दिनु उचित हुनेछ ।

वृश्चिक (तो, ना, नि, नु, ने, नो, या, यि, यु)

नयाँ मित्रता वा सम्बन्धप्रति मन आकर्षित हुनेछ । तर कुनै पनि प्रतिबद्धता वा वाचा गर्दा सावधानी अपनाउनु राम्रो हुन्छ । आत्मीय मित्र वा विपरीतलिंगी सहकर्मीको सहयोगले चाहेको काममा सफलता मिल्नेछ । कामको चाप बढे पनि मनमा सन्तुष्टि रहनेछ । समाजसेवा वा गैरलाभकारी कार्यतर्फ आकर्षण बढ्नेछ । प्रिय व्यक्तिसँग भेटघाट गर्न कठिनाइ भए पनि अन्ततः मनोरञ्जन, घुमघाम र कुराकानीका अवसर प्राप्त हुनेछन् ।

धनु (ये, यो, भ, भि, भु, ध, फा, ढ, भे)

घमण्ड र अहंकार त्यागेर व्यवहार गर्दा प्रगतिको मार्ग खुल्नेछ । आज लिएको एउटा सही निर्णय भविष्यका लागि महत्त्वपूर्ण बन्न सक्छ । प्रिय व्यक्तिको स्वास्थ्य वा कार्यक्षेत्रमा समस्या देखिँदा मन खिन्न हुन सक्छ । तर भावना आदानप्रदान गर्न पाउँदा मानसिक शान्ति प्राप्त हुनेछ । रोकिएका काम पूरा हुँदा अत्यन्त सन्तुष्टि मिल्नेछ । स्वास्थ्यमा सामान्य असर पर्न सक्ने भएकाले आवश्यक परे चिकित्सकको सल्लाह लिनु उचित हुनेछ ।

मकर (भो, ज, जि, खि, खु, खे, खो, गा, गि)

सन्तान वा सहयोगी व्यक्तिको सहयोगले व्यवस्थापनसम्बन्धी काम व्यवस्थित बनाउन सकिनेछ । बुद्धिमत्ता र व्यवहारिक सोचका कारण कमजोरीहरू सुधार हुनेछन् । मन प्रसन्न रहनेछ र सिर्जनात्मक क्षमता उजागर हुनेछ । टाढा रहेका आफन्त वा सन्तानबाट शुभ समाचार प्राप्त हुन सक्छ । सीपमूलक शिक्षा तथा प्राविधिक क्षेत्रमा आफ्नो क्षमता प्रदर्शन गर्ने अवसर मिल्नेछ । मेहनत र लगनशीलताले भाग्यको साथ पनि दिलाउनेछ ।

कुम्भ (गु, गे, गो, सा, सि, सु, से, सो, द)

घरजग्गा, रियल स्टेट, सेयर बजार वा अन्य अचल सम्पत्तिमा लगानी गर्ने सोच बन्न सक्छ । व्यापार विस्तारका लागि पनि खर्च हुने सम्भावना छ । दाम्पत्य जीवनमा कुनै विषयलाई लिएर वैचारिक मतभेद देखा पर्न सक्छ । धैर्य, सकारात्मक सोच र समझदारी अपनाउँदा परिस्थिति सहज बन्नेछ । गुरुजनको मार्गदर्शनले अनुभव र ज्ञान बढाउने अवसर मिल्नेछ । आमाको आशीर्वादले कार्यसफलता प्राप्त गर्न सहयोग पुग्नेछ ।

मीन (दि, दु, थ, झ, ञ, दे, दो, च, चि)

रोकिएका काममा पुनः प्रयास गर्दा सफलता प्राप्त हुनेछ । चुनौतीपूर्ण परिस्थितिमा सहकर्मी वा वरिष्ठ व्यक्तिको सहयोग मिल्नेछ । मनका कुरा खुलस्त रूपमा साझा गर्ने साथी तपाईंप्रति विशेष आकर्षित हुन सक्छन् । त्यस सम्बन्धलाई महत्व दिनु राम्रो हुनेछ । सामाजिक गतिविधिमा सक्रिय सहभागिता रहनेछ । धार्मिक तथा सांस्कृतिक कार्यक्रममा सहभागी हुँदा प्रतिष्ठा, सम्मान र पहिचान बढ्नेछ ।