धनुषाको मिथिला नगरपालिका ५ स्थित औरही खोलामा अवैध रुपमा वालुवा गिट्टी उत्खननकाे विरोध गरेको भन्दै ट्रिप्पर किचेर एक युवकको हत्या गरिएको छ ।

सोही वडाको श्रीपुरका २५ वर्षीय दिलिप भनिने ओमप्रकाश महतोले अवैध रुपमा उत्खनन् गरेको विरोध गर्दै बिहानै ना ७ ख ६४१३ नम्बरको ट्रिप्परलाई बाटोमै रोकेका थिए । चालकसँग भनाभन भएपछि ट्रिप्परले किचेर उनको हत्या गरिएको स्थानीयले बताएका छन् ।

औरही खोलामा अवैध तरिकाले उत्खनन् भइरहेको भन्दै विरोध गर्दै आएका महतोको शुक्रबार बिहान ४ बजे घरबाट छिमेकी साथी रोशन यादवसँग मर्निङ वाक गएको बेला घर नजिकैको खोलामा ट्रिप्परले किचेर उनको हत्या गरिएको स्थानीय रमेशकुमार महतोले जानकारी दिए ।

हत्या गरिएका महतो भारतमा इन्जिनियरिङ पढ्दै थिए । केही दिन यता विदामा घर आएका थिए । घटनाबारे इलाका प्रहरी कार्यालय ढल्केवरका इस्पेक्टर रामकुमार यादवले प्रहरीको टोली घटनास्थल पुग्दा मृत्यु भइसकेको जनाएकाे छ ।

प्रहरीले घटनास्थलबाट शवको मुचुल्का गरी पोस्टमार्टमको लागि प्रादेशिक अस्पताल जनकपुरमा पठाएको छ । ट्रिप्परलाई नियन्त्रणमा लिएर इलाका प्रहरी कार्यालय ढल्केवरमा राखिएको प्रहरीले जनाएको छ ।

प्रहरी निरीक्षक यादवले भने, ‘घटनाको प्रकृति हेर्दा नियोजित रुपमा ट्रिप्परले किचेर हत्या गरेको हुन सक्ने आशंका छ, अहिले अनुसन्धान तीव्र रुपमा भइरहेको छ ।’ खोला उत्खन्न गरिरहेकै स्थानमा ट्रिप्परले किचेर उनको हत्या भएकाे हुनसक्ने प्रहरीले जनाएको छ ।

स्थानीयहरुले घटनाको विरोधमा पूर्वपश्चिम राजमार्ग अवरुद्ध गरेका छन् । ट्रिप्पर र चालकलाई प्रहरीले नियन्त्रणमा लिएर अनुसन्धान गरिरहेकाे जनाएकाे छ ।

प्रकाशित समय : १८:१४ बजे