बरहथवा । यस जिल्लामा शान्तिपूर्ण रूपमा मतदान सम्पन्न भएको छ । छिटपुट घटनाबाहेक जिल्लामा कुनै प्रकारको विवाद नभएको जिल्ला सुरक्षा समिति संयोजक एवं प्रमुख जिल्ला अधिकारी रामुराज कडरियाले जानकारी दिए ।

चारवटा निर्वाचन क्षेत्र कायम सर्लाहीमा निर्धारित समयअनुसार बिहीबार बिहान ७ः०० बजेदेखि नै मतदान सुरु भएको थियो । साँझ ५ः०० बजेसम्म यहाँका करिब ६० प्रतिशत मतदाताले मत जाहेर गरेका मुख्य निर्वाचन अधिकृत पुष्पराज थपलियाले बताउनुभयो । सर्लाहीमा चारवटा निर्वाचन क्षेत्रमा गरी पाँच लाख ११ हजार ६०६ जना मतदाता छन् । त्यसमध्ये आधाभन्दा बढीले मतदान गरेका प्रारम्भिक विवरण प्राप्त भएको हो ।

अहिले जिल्लाका सबै मतदान केन्द्रमा मतपेटिका सङ्कलन सम्पन्न गरी कोठामा बन्द गरिएको उहाँको भनाइ छ । त्यसपछि बसेको सर्वदलीय बैठकबाट जिल्लाको १ र २ नं क्षेत्रमा बिहानदेखि मतगणना सुरु गर्ने तय भएको छ भने क्षेत्र नं ३ को बैठक जारी छ । क्षेत्र नं ४ मा भने बैठकसमेत बस्न बाँकी रहेकाले आज बिहान बैठक बसेर गणना सुरु गर्ने तयारी गरिएको निर्वाचन अधिकृतको कार्यालयले जनाएको हो ।

अधिकांश क्षेत्रको मतपेटिका सङ्कलन र रुजुका लागि रातको ११ः०० बजेसम्म लागेको थियो । चुरे भेगका गाउँबाट मतपेटिका ल्याउन समय लागेको क्षेत्र नं १ का निर्वाचन अधिकृत टीकाबहादुर थापाको भनाइ थियो । मतदान सम्पन्न भएपछि साँझ नेपाली सेना, नेपाल प्रहरी, सशस्त्र प्रहरी र निर्वाचन प्रहरीको कडा घेरामा मतपेटिका मतगणनास्थलसम्म पुर्याइएको छ ।

सर्लाही क्षेत्र नम्बर १ को लागि लालबन्दी नगरपालिका–१०, चन्द्रपुर वडा कार्यालयमा, क्षेत्र नं २ को जिल्ला समन्वय समितिको सभाहलमा, क्षेत्र नं ३, को हरिवनस्थित नापी कार्यालय भवनमा र क्षेत्र नं ४ को गोडैता बजारस्थित बेणी भोला नमूना माध्यमिक विद्यालयमा मतगणनाको तयारी गरिएको छ ।

सर्लाहीका क्षेत्र नं ४ स्थित बलरा नगरपालिका–४, जब्दीमा रहेको प्राथमिक विद्यालय मतदान केन्द्रमा दलका प्रतिनिधिबीच विवाद भएपछि केहीबेर मतदान रोकिएको थियो भने धन्कौल, मानपुर र बसवरिया गाउँपालिकाको जनता मावि भवानीपुर मतदान केन्द्रमा समेत सामान्य विवाद भएको थियो । तर तत्कालै सुरक्षाकर्मी उपस्थित भई अवस्था नियन्त्रणमा लिएका थिए । प्रमुख जिल्ला अधिकारी कडरियासहितको सुरक्षा अधिकारीको टोली मतदानस्थल पुगेर निरीक्षण गर्दै आवश्यक निर्देशन दिएको थियो ।

छ सय २८ मतदान केन्द्रबाट यहाँका मतदाताले मत जाहेर गरेका छन् । दुई लाख ७८ हजार ८३७ पुरुष, दुई लाख ३२ हजार ७५८ महिला र ११ जना अन्य मतदाता रहेको यस जिल्लामा ६० प्रतिशत हाराहारीमा मात्र मत खसेको हो । सुरक्षा दृष्टिकोणले अधिकांश क्षेत्रलाई अतिसंवेदनशील कायम गरिएको सर्लाही–४ मा ठूलो सङ्ख्यामा सुरक्षाकर्मी परिचालन गरिएको थियो । नेपाली कांग्रेसका सभापति गगनकुमार थापाको उम्मेदवारी परेको यस क्षेत्रको देशमै महत्त्वपूर्णमध्येको एक क्षेत्रका रूपमा चर्चा र चासो व्यक्त हुँदै आएको छ ।