ऋणीले ऋण तिर्न नसकेपछि बैंकहरुले सकारेका सम्पत्ती धमाधम बेच्न थालेका छन् । एनएमबि बैंकले विभिन्न ५ जिल्लाका १४ ठाउँको गैरबैंकिङ सम्पत्ति बेच्ने भएको छ । गैरबैंकिङ सम्पत्ति लिलामी गर्न एनएमबि बैंकले १५ दिनभित्र गोप्य आवेदन दिन आग्रह गर्दै बिहीबार एक सूचना समेत सार्वजनिक गरेको छ ।

बैैंकले जारी गरेको यस्तो सूचना अनुसार सुनसरीको धरानमा तीन वटा कित्ताको घरजग्गा, मोरङमा एउटा कित्ताको जग्गा, सिराहाको रामनगरको तीन वटा कित्ताको जग्गा बिक्री गर्ने भएको छ ।

यो बैंकले दैलेखको नारायणमा रहेको तीन वटा कित्ताको घरजग्गा र रुपन्देहीको केरवानी तथा मधवलियामा रहेको घरजग्गालाई लिलामी बिक्री गर्ने भएको छ । बैैंकले लिलामी गर्न लागेको यी घरजग्गा लिन चाहने ग्राहकले तोकिएको प्रकृया पूरा गरी १५ दिनभित्र गोप्य शिलबन्दी आवेदन दिनुपर्ने भएको छ ।

यसैबीच एनआईसी एशिया बैंकले देशभर विभिन्न स्थानमा आफ्नो नाममा रहेका घरजग्गा बेच्ने भएको छ । बैंकको कर्जा असुली विभागले बैंकको नाममा रहेको १७० वटा गैर बैंकिङ सम्पत्ति बेच्न लागेको सूचना निकालेको हो ।

बैंकबाट ऋण लिएर भाखा नाघेपछि पनि नतिरेका ऋणीको सम्पत्तिलाई बैंकले बेच्ने प्रयास गर्दा पनि नबिकेपछि आफ्नो नाममा सकारेको सम्पत्ति नै गैरबैंकिङ सम्पत्ति हो । बैंकले बेच्न लागेको यस्ता सम्पत्ति जग्गा र जग्गामा बनेका घर (जग्गासहित) रहेका छन् ।

यस्ता घरजग्गा झापा, नुवाकोट, नवलपरासी, चितवन, काठमाडौं, दोलखा, ललितपुर, धनुषा, मोरङ, मकवानपुर, आदि जिल्लामा छन् ।
बैंकले ७ दिनभित्र इच्छुक व्यक्ति, संस्था तथा कम्पनीलाई के कति मूल्य तिरी किन्न चाहेको हो भन्ने मूल्य खोली शीलबन्दी बोलपत्र पेश गर्न भनेको छ ।

यसैबीच नबिल बैंकले देशका विभिन्न ठाउँमा आफ्नो स्वामित्वमा रहेको घरजग्गा बेच्ने भएको छ । बैंकले एक सूचना जारी गर्दै २५ जिल्लाका ९२ स्थानमा रहेको घरजग्गा बिक्री गर्ने जानकारी गराएको हो ।

बैंकले विभिन्न समयमा ऋणीको धितो लिलाम हुन नसकेर आफूले सकारेको गैर बैंकिङ सम्पत्तिको रुपमा रहेका घरजग्गा बिक्री गर्न लागेको हो । बैंकले काठमाडौं, भक्तपुर, ललितपुर, झापा, मोरङ, सुनसरी, सप्तरी, सिरहा, धनुषा, बारा, पर्सा, मकवानपुर, चितवन, नवलपरासी (पूर्व), नवलपरासी (पश्चिम), रुपन्देही, बाँके, सुर्खेत बर्दिया, कैलाली, भोजपुर, दोलखा, काभ्रे, नुवाकोट र दार्चुला जिल्लाका विभिन्न स्थानमा रहेको सम्पत्ति बिक्री गर्न लागेको हो।

उक्त सम्पत्ति खरिद गर्न इच्छुक व्यक्ति, फर्म, कम्पनी, संघ संस्थाहरूले मंसिर ९ गतेसम्म गोप्य शिलबन्दी पेश गर्नुपर्ने बैंकले जनाएको छ । उक्त बोलपत्र मंसिर १० गते खोलिने समेत बैंकले जनाएको छ ।

ऋणीले समयमै कर्जा तिर्न नसकेपछि धितो राखिएको सम्पत्ति बैंकहरूले लिलामी गर्नुपर्ने हुन्छ । उक्त लिलामी बिक्री नभएमा बैंकले आफैंले सकार्न पाउँछन् । तर, धितो सकार्दा बैंकहरूले बढीमा १५० रोपनी जग्गा मात्र आफ्नो नाममा राख्न पाउँछन् । सीमाभन्दा बढी भएपछि बैंकहरूले त्यस्तो सम्पत्ति बेच्ने गरेका छन् ।

प्रकाशित समय : १९:२३ बजे