भद्रपुर । स्थानीयले सांकेतिक रूपमा सडकमा धान रोपेर विरोध जनाएपछि अर्जुनधारा नगरपालिकाले जीर्ण सडकको तत्काल मर्मत सुरु गरेको छ ।

वडा नम्बर २ स्थित गाँजाबारीमा अत्यधिक हिलो र खाल्डाखुल्डीका कारण आवागमन प्रभावित भएपछि केही दिनअघि स्थानीयले मदन भण्डारी राजमार्गबाट लाप्चेटार–बदमटार हुँदै इलामका विभिन्न स्थान जोड्ने सडकमा धान रोपेर सम्बन्धित निकायको ध्यानाकर्षण गराएका थिए ।

स्थानीयको गुनासोपछि नगरपालिकाका प्रमुख बलदेवसिंह गोम्देन तामाङले आज सडकको स्थलगत निरीक्षण गर्दै खाल्डाखुल्डी तत्काल पुरी सडकलाई आवागमनयोग्य बनाउन सम्बन्धित शाखालाई निर्देशन दिएको हो । निर्देशनसँगै नगरपालिकाको व्यवस्थापनमा ट्याक्टरमार्फत माटो हालेर सडक मर्मतको काम सुरु गरिएको हो ।

प्रमुख गोम्देनले स्थानीय सरकार नागरिकका समस्या समाधानप्रति सधैँ जिम्मेवार र संवेदनशील रहेको बताउँदै समयमै समस्या जानकारी गराउन नागरिकलाई आग्रह गरे् । उनले भने, “स्थानीय सरकार नागरिकका समस्याप्रति सधैँ जिम्मेवार छ । गाउँ, टोल तथा नगर क्षेत्रमा देखिएका समस्या तत्काल जानकारी गराउनुस्, हामी आवश्यक स्रोत परिचालन गरेर यथाशीघ्र समाधान गर्न प्रयास गर्नेछौँ ।”

प्रकाशित समय : २१:२२ बजे