जापानको दक्षिणी मुख्य टापु क्युशुको कुमामोतो क्षेत्रमा मङ्गलबार सात दशमलव एकम्याग्निच्युडको भूकम्प गएको छ । भूकम्पका कारण केही भवन तथा पूर्वाधारमा क्षति पुग्नुका साथै आगलागी र मानिस घाइते भएका घटना सार्वजनिक भएका छन् ।

जापानको मौसम विज्ञान एजेन्सी ९जेएमए०ले सुरुमा कुमामोतो, नागासाकी, फुकुओका र सागा प्रिफेक्चरका पश्चिमी तट तथा आसपासका आरियाके र यात्सुशिरो सागरमा सुनामीको चेतावनी जारी गरे पनि करिब दुई घण्टापछि फिर्ता लिएको थियो ।

अमेरिकी भूगर्भ सर्वेक्षण (यूएसजीएस)ले सुरुमा भूकम्पको तीव्रता सात दशमलव एक म्याग्निच्युड रहेको जनाए पनि पछि संशोधन गरी छ दशमलव आठ म्याग्निच्युड कायम गरेको छ ।

प्रधानमन्त्री सानाए ताकाइचीले सम्भावित क्षतिको विवरण सङ्कलन, मूल्याङ्कन तथा आवश्यक उद्धारकार्यका लागि सरकारले कार्यदल गठन गरेको बताउनुभएको छ । उनका अनुसार सडक, पुल तथा भवनमा क्षति पुगेको, विद्युत् आपूर्ति अवरुद्ध भएको र केही स्थानमा आगलागी भएको छ । केही मानिस घाइते भएको उनले जानकारी दिएको छन् ।

क्योदो समाचार एजेन्सीका अनुसार यात्सुशिरो सहरको एउटा अस्पतालमा भूकम्पमा घाइते भएका करिब ४० जनालाई उपचारका लागि भर्ना गरिएको छ । यात्सुशिरो स्टेसनमा एउटा रेल लिकबाट बाहिरिएको तथा कुमामोतो दरबारको ढुङ्गाको पर्खालमा क्षति पुगेको जनाइएको छ ।

नजिकैको माशिकी सहरमा एउटा मन्दिरका ढुङ्गाका लालटिन भत्किएका छन् । स्थानीय बासिन्दाले भूकम्पको धक्काले सन् २०१६ मा कुमामोतोमा गएको शक्तिशाली भूकम्पको स्मरण गराएको बताएका छन् ।

जापानको अग्नि तथा विपद् व्यवस्थापन एजेन्सीले प्रमुख सार्वजनिक संरचना तथा पूर्वाधारमा ठूलो क्षति पुगेको विवरण प्राप्त नभएको जनाएको छ । यद्यपि, स्थानीय दमकल कार्यालयमा आगलागी र घरमा क्षति पुगेको जानकारीसहित धेरै आपत्कालीन फोन आएका छन् ।

जेएमएका भूकम्प तथा सुनामी प्रतिरोध योजना अधिकारी शिन्जी कियोमोटोले भूकम्पपछि क्षेत्रमा भूकम्पीय गतिविधि बढेको बताउँदै आगामी दुइदेखि तीन दिनसम्म विशेष सतर्क रहन बासिन्दालाई आग्रह गरेका छन् । उनले हालसम्म भूकम्पका कारण सुनामी नदेखिएको जानकारी दिएको छन् ।

जापानको आणविक नियमन प्राधिकरणका अनुसार नजिकका तीन आणविक ऊर्जा केन्द्रमा कुनै असामान्य अवस्था देखिएको छैन ।

भूकम्पपछि क्युशुमा शिन्कानसेन बुलेट रेल तथा स्थानीय रेल सेवा सुरक्षा जाँचका लागि स्थगित गरिएको छ । आसो कुमामोतो विमानस्थलको धावनमार्ग पनि बन्द गरिएको छ । जापानी रक्षा मन्त्रालयले अवस्थाको मूल्याङ्कनका लागि प्रभावित क्षेत्रमा विमान पठाएको जनाएको छ ।

कुमामोतोमा सन् २०१६ मा गएको शक्तिशाली भूकम्पमा ५० भन्दा बढी मानिसको मृत्यु हुनुका साथै करिब एक हजार ८०० जना घाइते भएका थिए । त्यसबेला दशौँ हजार घरमा क्षति पुगेको थियो ।

प्रकाशित समय : २०:१४ बजे