प्राकृतिक जलाशय मत्स्य प्रवर्द्धन एवं संरक्षण केन्द्रको अतिक्रमित जमिन खाली गराउने प्रक्रिया सुरु भएको छ । केन्द्रको कार्यालय हेटौँडाको लामो समयदेखि अवैधरूपमा करोडौँ मूल्य बराबरको अतिक्रमित जमिन खाली गराउने प्रक्रिया सुरु भएको हो ।

हेटौँडा उपमहानगरपालिका–५ मा रहेको सो कार्यालयले अतिक्रमित जमिन खाली गर्न ३५ दिने सूचनासमेत जारी गरेको छ । केन्द्रिय मत्स्य प्रवर्द्धन एवं संरक्षण केन्द्रको कार्यालय बालाजु काठमाडौँ र जिल्ला प्रशासन कार्यालय मकवानपुरको सरकारी जग्गा संरक्षण गर्ने पत्रका आधारमा ३५ दिने सूचना जारी गरी अतिक्रमित जग्गा खाली गर्न सार्वजनिक सूचना गरेको कार्यालय प्रमुख सरोजकुमार यादवले जानकारी दिए ।

यसरी अतिक्रमण गर्ने व्यक्तिको नाम र जमिनको कित्ता नम्बारसहित सार्वजनिक गरिएको छ । जग्गा खाली गर्न सूचना जारी गरेको मितिभित्र खाली नगरेमा सो कार्यालयले भत्काउने प्रमुख यादवले स्पष्ट पारे । कार्यालय मातहत रहेको ४९ हेक्टर जमिनमध्ये नौ बिघा सात कठा १३ धुर जमिन अतिक्रमण गरी संरचनासमेत निर्माण भएको कार्यालयद्वारा तयार गरिएको प्रतिवेदनमा जनाइएको छ ।

सो अतिक्रमित जमिन उपलब्ध गराउन र भौतिक संरचना हटाउन जिल्ला प्रशासन कार्यालय हेटौँडामा लिखितरूपमा जानकरी गराइएको थियो । साथै अतिक्रमित जमिन नापी कार्यालयबाट व्यक्तिको नाममा कित्ताकाटसमेत भएकाले नापी कार्यालय तथा मालपोत कार्यालय हेटौँडालाई पुनःनापीका लागि लिखित जानकारी गराइएको र यकीन भएपछि खाली गराउने कार्य सुरु गरेको उनले बताए ।

जिल्ला प्रशासन कार्यालयमा अतिक्रमण भएको जमिनको पेश विवरणअनुसार कित्ता नं ९६ को आठ बिघा १४ कठा जमिनमा पिप्ले युवा क्लबले रगङ्शाला निर्माण, हेल्थ पोष्ट निर्माण तथा कार्यालय भवन अतिक्रण गरी रेष्टुराँसमेत सञ्चालन गरेको उल्लेख गरिएको छ । साथै अन्य सात जना व्यक्तिले सो कार्यालयको जमिन अतिक्रमण गरी घर, टहरा तथा होटल, रेष्टुराँ व्यवसाय र कुखुरा फार्म सञ्चालन गरेको जनाइएको छ ।

यही जेठ ८ गते जिल्ला प्रशासन कार्यालयले सरकारी कार्यालयको जग्गा अतिक्रमण सम्बन्धमा विवरण पेश गर्न निर्देशन जारी गरेपछि सो मत्स्य केन्द्रको कार्यालयले आफ्नो अतिक्रमित जमिनबारे जानकरी गराएको थियो । स्थानीय पिप्ले युवा क्लबले खेल मैदान र खेल संरचनासमेत निर्माण गरेकाले त्यसबारे कृषि तथा पशुपन्छी विकास मन्त्रालयमा छलफल भइरहको बताइएको तर व्यक्तिको हकमा खाली गराउने उनको भनाइ रहेको छ ।

सो कार्यालयले स्थापना भएको विसं २०२४ देखि आफ्नो पोखरीमा विभिन्न प्रजातिका माछाको भूरा उत्पादन, विकास, संरक्षण तथा माछाको बिक्री वितरण माछाको सम्बन्धमा सचेतना कार्यक्रम गर्दै आएको छ ।