काठमाडौँ महानगरपालिकाले राष्ट्रिय प्रजातन्त्र पार्टी (राप्रपा)को धुम्बराहीस्थित कार्यालयमा डोजर चलाउने भएको छ ।

महानगरले डोजर चलाउने सूचना पाएपछि राप्रपाका कार्यकर्ताहरुले पार्टी कार्यालय घेरेका छन् । डोजर आउनुअघि नै कार्यकर्ताले कार्यालय अगाडी घेरेर बसेका छन् ।

महानगरले गत असोज १३ गते सूचना जारी गरेर कार्यालय हटाउन भनेको थियो तर राप्रपाले अटेरी गरेपछि महानगरको टोलीले आज (सोमबार) कार्यालय भत्काउने तयारी गरेको बताएको छ ।

राप्रपाको धुम्बराहीस्थित पार्टी कार्यालयमाथि विद्युत प्रशारण लाइन (हाइटेन्सन लाइन)को रहेको भन्दै महानगरपालिकाले आज भत्काउने सूचना दिएपछि कार्यकर्ता कार्यालय घेरेका हुन् ।

हाइटेन्स लाइनको तल निर्माण भएका संरचानाहरु सुरक्षाको हिसाबले अतिजोखिमपूर्ण मानिन्छ ।
यस्तै, महानगरले सो स्थानबाट पार्टी कार्यालय हटाउन अल्टिमेटम दिएको छ । महानगरपालिकाले शुक्रबार माइकिङ गर्दै सोमबारभित्र पार्टी कार्यालय हटाउन अल्टिमेटम दिएको हो ।

हाइटेन्सन लाइनमुनि भवन बनाएको भन्दै महानगरपालिकाले हटाउन लागेको हो । तर राप्रपाले नगरप्रहरीको टोलीलाई लिखितरुपमा यसबारे आफूहरुलाई दिन आग्रह गरेको छ । पार्टी कार्यालयका मुख्यसचिवले यसबारे लिखित दिन आग्रह गरेका हुन् ।