बीमा प्राधिकरणका अनुसार, चालु आवको जेठसम्ममा यी कम्पनीहरूले ६० हजार ४२६ वटा वैदेशिक बीमालेख जारी गरेका छन् ।वैदेशिक रोजगारीमा जानेहरूको संख्या वृद्धिसँगै यस्तो बीमामा आकर्षण बढेको हो ।

चालु आवको वैशाखसम्ममा यी कम्पनीहरूले वैदेशिक रोजगार बीमालेख बिक्री गरी २ अर्ब ७१ करोड ३२ लाख रुपैयाँ बीमाशुल्क संकलन गरेका थिए । वैदेशिक रोजगार बीमा गर्नेहरूको संख्या उत्साहजनक रुपमा बढेको छ ।

विभिन्न १० जीवन बीमा कम्पनीहरूले वैदेशिक रोजगार बीमालेख बिक्री गरि जेठसम्ममा २ अर्ब ९६ करोड ९२ लाख रुपैयाँ बीमा शुल्क संकलन गरेका छन् । जुन अघिल्लो महिनाको तुलनामा २५ करोड ६० लाख रुपैयाँले बढी हो ।

सात प्रदेशहरूमध्येमा जीवन बीमा कम्पनीहरूले बागमती प्रदेशबाट सबैभन्दा बढी बीमाशुल्क संकलन गरेको छ । जेठसम्ममा बागमती प्रदेशमा विभिन्न बीमालेखको बिक्रीमार्फत ५५ अर्ब ९१ करोड ३८ लाख रुपैयाँ बीमाशुल्क संकलन भएको छ ।

यस्तै लुम्बिनी प्रदेशमा १८ अर्ब ३३ करोड ५८ लाख रुपैयाँ बीमाशुल्क बीमा कम्पनीहरूले संकलन गरेका छन् । कोशी प्रदेशमा १५ अर्ब ६ करोड १९ लाख, गण्डकीमा १२ अर्ब ३६ करोड ३७ लाख, मधेशमा ११ अर्ब ५० करोड १३ लाख, सुदूरपश्चिममा ६ अर्ब ३९ करोड २३ लाख र कर्णालीमा ४ अर्ब ९७ करोड ४६ लाख रुपैयाँ बीमाशुल्क संकलन भएको छ ।

यो बीमा सबैभन्दा धेरै १६ हजार २६० वटा बीमालेख नेपाल लाइफ इन्स्योरेन्स कम्पनी लिमिटेडबाट जारी भएको छ । यस कम्पनीले जेठसम्ममा ४१ करोड ६४ लाख रुपैयाँ बीमाशुल्क वैदेशिक रोजगार बीमालेखको बिक्रीबाट आर्जन गरेको छ । यस्तै सन नेपाल लाइफ इन्स्योरेन्स कम्पनी लिमिटेडले १५ हजार २४७ वटा वैदेशिक बस्मालेख बिक्री गरि जेठसम्ममा १ अर्ब २ करोड ३८ लाख रुपैयाँ बीमाशुल्क आर्जन गरेको छ ।

सन नेपालपछि आइएमई लाइफ इन्स्योरेन्स कम्पनी लिमिटेडले ८ हजार २८३ वटा वैदेशिक रोजगार बीमालेख जारी गरि जेठसम्ममा ३९ करोड २७ लाख रुपैयाँ बीमाशुल्क संकलन गरेको छ ।

प्राधिकरणका अनुसार, सानिमा रिलायन्स लाइफ इन्स्योरेन्स कम्पनीले ६ हजार १६ वटा वैदेशिक रोजगार बीमालेख जारी गरि २३ करोड ८७ लाख रुपैयाँ बीमाशुल्क आर्जन गरेको छ । रिलायवल नेपाल लाइफ इन्स्योरेन्स कम्पनीले जेठसम्ममा ४ हजार ४३७ वटा वैदेशिक रोजगार बीमालेख जारी गरेको छ । जसबापत कम्पनीले १५ करोड ७८ लाख रुपैयाँ बीमा शुल्क आर्जन गरेको छ ।

यस्तै सिटिजन लाइफ इन्स्योरेन्सले ३ हजार १०१ बीमालेख जारी गरि १८ करोड ४९ लाख रुपैयाँ बीमाशुल्क आर्जन गरेको छ । यस्तै बाँकी रहेका एसियन लाइफ, सूर्यज्योति लाइफ र प्रभु लाइफले भए २ हजारभन्दा कम वैदेशिक रोजगार बीमालेख जारी गरेका छन् ।

कोरोना महामारीबाट तंग्रिएपछि विभिन्न मुलुकमा नेपालबाट रोजगारीका लागि जानेको संख्या बढ्दै जाँदा बीमामा पनि उत्साहजनक वृद्धि देखिएको हो । पछिल्लो समय बीमा कम्पनीहरूले डिजिटल प्रविधिलाई आत्मसात् गर्दै जाँदा कतिपय झन्झटिला प्रक्रियामा सेवाग्राहीहरू अलमलिन पर्दैन ।

यसरी कम्पनीहरूले अनलाइनबाट बीमालेख किन्न सक्ने व्यवस्थालाई बढावा दिँदा सेवाग्राहीहरूले पनि यसप्रति चासो देखाउने गरेका छन् । सोही कारण वैदेशिक रोजगारीमा जानेहरूले सक्रियतापूर्वक बीमामा सहभागी हुने गरेको बीमा कम्पनीका अधिकारीहरू बताउँछन् ।

जेठ महिनासम्ममा सञ्चालनमा रहेका विभिन्न १५ जीवन बीमा कम्पनीहरूले १ खर्ब २४ अर्ब ५४ करोड ३८ लाख रुपैयाँ बीमा शुल्क संकलन गरेका छन् । १ करोड ४० लाख ६९ हजार ९३७ वटा बीमालेख जारी गरि कम्पनीहरूले १ खर्ब २४ अर्बभन्दा बढी बीमाशुल्क संकलन गरेका हुन् ।

जेठ महिनामा मात्रै कम्पनीहरूले ८ लाख ४५ हजार ३६२ वटा जीवन बीमालेख जारी गरेका छन् । जसबापत कम्पनीहरूले १० अर्ब ४३ करोड ४० लाख रुपैयाँ बीमाशुल्क संकलन गरेको प्राधिकरणको तथ्यांकमा छ । प्राधिकरणका अनुसार, विभिन्न १३ जीवन बीमा कम्पनीहरूले जेठ महिनामा १ लाख ८२ हजार ९७९ वटा लघु बीमालेख जारी गरेका छन् ।

जसबाट उनीहरूले १६ करोड ७६ लाख रुपैयाँ बीमाशुल्क संकलन गरेका छन् । जेठसम्ममा भने कम्पनीहरूले ४१ लाख ६९ हजार २०६ लघुबीमालेख जारी गरि २ अर्ब १३ लाख ९१ हजार रुपैयाँ बीमाशुल्क संकलन गरेका छन् ।

प्रकाशित समय : १७:१६ बजे