प्रस्तावित प्रधानन्यायाधीश हरिकृष्ण कार्कीविरुद्धको सुनुवाई बिहिबार हुने भएको छ।

संसदीय सुनुवाइ समितिले प्रधानन्यायाधीशमा सिफारिस भएका कार्कीको सुनुवाइ बिहीबार गर्ने भएको हो । उनीविरुद्ध २९ वटा उजुरी परेका छन् । समितिले सदस्यहरूलाई उजुरी वितरण गरेसँगै सुनुवाइको मिति तय भएको हो । सुनुवाइ हुनुअघि नै समितिले उजुरीकर्तासँग छलफलको तयारी गरेको छ ।

जेठ १६ गते बसेको समितिको बैठकले कार्कीविरुद्ध उजुरी आह्वान गर्ने निर्णय गरेको थियो । सोही बमोजिम जेठ २६ गतेसम्म कार्कीविरुद्ध २९ वटा उजुरी परेका छन् ।

उजुरीकर्ताले कार्की एमाले कार्यकर्ता भएको, निष्पक्ष न्याय सम्पादन गर्ने योग्यता नभएको, पालो मिचि अघि आएको जस्ता आरोप लगाएका छन् ।

कार्कीलाई आफ्नै ल फर्मका साझेदार अग्नि खरेलले न्यायाधीश बनाएको उजुरीकर्ताको आरोप छ । अर्का उजुरीकर्ताले कार्कीको नियुक्तिका लागि संवैधानिक परिषद्सम्बन्धी काम, कर्तव्य र ऐन रिक्त रहेको, त्यसविरुद्ध सर्वोच्चमा मुद्दा विचाराधीन रहेकाले उनको नियुक्ति नै कानुन अभावको अवस्थामा भएकाले सिफारिस खारेज गर्न माग गरेका छन् ।

कार्कीलाई नाममात्रै लेखाउन प्रधानन्यायाधीशमा नियुक्त गर्न नहुने उजुरीकर्ताको माग छ । कार्कीले ६५ वर्षे उमेरहदका कारण साउन १९ मा अवकाश पाउँदै छन् । उनी आठ महिनादेखि कामु प्रधानन्यायाधीशको जिम्मेवारीमा छन् ।

प्रकाशित समय : ०८:५८ बजे