शाइन रेसुंगा डेभलपमेन्ट बैंक १४औं वर्ष पूरा गरी १५औं वर्षमा प्रवेश गरेको छ । साे बैंक २०६५ साल फागुन ११ गते बुटवलको ट्राफिक चोकबाट सञ्चालनमा आएको हाे ।

बैंकले १४ वर्षको अवधिमा ८८ वटा शाखा, एउटा एक्सटेन्सन कार्यालय र १६ स्थानमा एटीएममार्फत ६ लाखभन्दा बढी ग्राहकलाई सेवा दिइरहेको छ । बैंकले प्रदेश १ र मधेश प्रदेशबाहेक पाँच वटा प्रदेशका २० जिल्लामा शाखा विस्तार गरिसकेको छ । बैंकका अध्यक्ष थानेश्वर पौडेलका अनुसार ८८ वटा शाखामध्ये ७२ वटा शाखा लुम्बिनी प्रदेशका १० वटा जिल्लामा मात्रै रहेका छन् लुम्बिनीका रोल्पा र रुकुम पूर्वबाहेक १० वटै जिल्लामा शाखा विस्तार गरी सेवा दिइरहेको छ ।

त्यस्तै, बागमती प्रदेशमा काठमाडौंमा ६ वटा शाखा विस्तार गरेको छ भने चितवन, ललितपुर र भक्तपुरमा एक/एक वटा शाखा रहेका छन् । बैंकले कैलालीमा २ वटा र कास्की, बाग्लुङ, नवलपुर, कञ्चनपुर र सुर्खेतमा एक/एक वटा शाखा विस्तार गरेको अध्यक्ष पाैडेलले जानकारी दिए ।

प्रदेश नम्बर १ र मधेश प्रदेश बाहेकका सबै प्रदेशमा बैंकको पहुँच पुगेको छ । लुम्बिनी प्रदेशको बुटवलमा केन्द्रीय कार्यालय रहेकाले अधिकांश शाखा सञ्जाल लुम्बिनी प्रदेशमा नै केन्द्रित छन् ।

बैंकले उपत्यकामा पनि आफ्नो सेवा विस्तार गरिसकेको छ । गत वर्ष मात्रै बैंकले दर्जन बढी शाखा कार्यालय काठमाडौं उपत्यकामा सञ्चालनमा ल्याएको हो । अध्यक्ष पौडेलले बैंकले आवश्यकता हेरेर मात्रै शाखा विस्तार गर्दै आएको बताए ।

बैंकको हालको चुक्ता पुँजी ४ अर्ब २८ करोड रुपैयाँ र जारी पुँजी ५ अर्ब रुपैयाँ पुगेको छ । बैंकले व्यापार, कृषि, उद्योग, होटल तथा पर्यटन क्षेत्रमा कुल कर्जाको ५७.४० प्रतिशत कर्जा लगानी गरेको छ । जसमा व्यापारतर्फ २१.८० प्रतिशत, कृषि क्षेत्रमा ७.१२ प्रतिशत, होटल तथा पर्यटनतर्फ १५.६९ प्रतिशत र लघु, घरेलु तथा साना उद्यम व्यवसाय क्षेत्रमा १२.७९ प्रतिशत कर्जा लगानी गरेको छ ।

बुटवलमा केन्द्रीय कार्यालय रहेको शाइन रेसुंगा डेभलपमेन्ट बैंकमा हाल ९८७ जना कर्मचारी कार्यरत छन् ।