प्रधानमन्त्री निवास बालुवाटारमा, कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधवकुमार नेपाल सरकार गठनको विषयमा आइतबार बिहान गहन छलफलमा थिए ।

शनिबार बसेको बैठकमा २ वर्ष कांग्रेस, २ वर्ष माओवादी केन्द्र र १ वर्ष नेकपा (एकीकृत समाजवादी)ले सरकारको नेतृत्व गर्ने सम्झौता भएको थियो ।

तर, कसले पहिला गर्ने ? भन्ने विषयमा सहमति जुट्न नसकेपछि नेकपा माओवादी केन्द्रका अध्यक्ष पुष्पकमल दाहाल प्रचण्ड बालुवाटारबाट निस्किएका छन् । प्रचण्ड निस्किए लगत्तै, नेकपा एमालेका अध्यक्ष केपी शर्मा ओलीलाई भेट्न बालकोट प्रस्थान गरेका छन् ।

सरकार गठनका लागि राष्ट्रपति विद्यादेवी भण्डारीले दिएको समय सिमाभित्र सरकार बनाउने गरी देउवा र प्रचण्ड छलफल गरेका थिए । तर दुवै नेताले पहिलो कार्यकालमा आफू प्रधानमन्त्री हुन चाहेपछि सहमति हुन सकेको छैन। राष्ट्रपति भण्डारीले सरकार गठनका लागि दिएको ७ दिनको समय आज सकिँदैछ।