नेपाल रेमिट इन्टरनेशनल प्रालिको प्रमुख कार्यकारी अधिकृत (सीईओ)मा रेमिट्यान्स क्षेत्रका चर्चित व्यक्तित्व एवं चार्टर्ड एकाउण्टेन्ट सागर खनाल नियुक्त भएका छन् । २९ वर्षीय खनालको रेमिट्यान्स क्षेत्रमा ७ बर्षभन्दा बढी समयको अनुभव छ ।

बिजनेस, रणनीति र योजना तथा मार्केटिङ र व्यवस्थापनमा राम्रो अनुभव भएका खनालको रेमिट्यान्स क्षेत्रमा स्थापित नाम हो । खनाललाई एक समारोहका बिच नेपाल रेमिट इन्टरनेशनल प्रालिका अध्यक्ष रितश मित्तलले स्वागत गरे । खनालले आफ्नो पदभार समेत ग्रहण गरिसकेका छन् । विगत १७ वर्षदेखि रेमिट्यान्स क्षेत्रमा काम गर्दै आएको नेपाल रेमिट इन्टरनेशनल प्रालिले डिजिटल रेमिट्यान्समा अझै जोड दिँदै विश्वका विभिन्न कुनाबाट रेमिट्यान्स भित्राउँदै आएको छ ।

पदभार ग्रहण गर्दै सीईओ खनालले धेरै कुरा डिजिटल रुपमा भइरहेकाले सस्तो, भरपर्दो र रियल टाइम सेवाका लागि डिजिटल रेमिट्यान्सलाई प्राथमिकता दिँदै आम नेपालीलाई सेवा प्रदान गर्ने बताए । ‘रेमिट्यान्ससमेत डिजिटल रुपमा भित्राइ मुलुकको डिजिटल अर्थतन्त्रलाई टेवा पुर्‍याउने हाम्रो लक्ष्य हो,’ उनले भने ।

नेपाल रेमिट इन्टरनेशनल प्रालिले नेपालका सबै बैंक खातामा रियल टाइममै रेमिट्यान्स जम्मा गर्दै आइरहेको छ । यस रेमिटले हाल देशभर रहेका १० हजारभन्दा बढी एजेन्ट नेटवर्कबाट सेवा प्रदान गर्दै आएको छ ।