आँगनभर किताबै किताब । केही धमिराले खाएको अवस्थामा । केही पानीले भिजेर टुक्रा टुक्रा परेर अवशेष मात्र । यी कागजात सामान्यखालका भने होइनन् । नेपालको इतिहास बोकेका महत्वपूर्ण दस्तावेज आजभोली केशर पुस्तकालयको आगनमा दिनभर सुकाइन्छ । अनि बोरामा पोको पारेर राखिन्छ । बोरामा पोको पारेर राख्दा पानीले भिजेर बिग्रिसकेका कागजात केशर पुस्तकालयले दिनभर घाममा सुकाउन थालेको हो ।

केशर पुस्तकालय पुनर्निर्माणको ठेक्का जेटसीजी आई जेभी निर्माण कम्पनीले पाएको छ । ऐतिहासिक, पुरातात्विक, राजनीतिक, धार्मिकलगायत करिब ६० हजार पुस्तक भएको केशर पुस्तकालय ऐतिहासक हो  । २०७२ सालको भूकम्पले केशर पुस्तकालय रहेको भवनमा क्षति पुगेपछि अझै पुनर्निर्माणको काम हुन सकेको छैन । जसले गर्दा त्यहाँभित्र रहेका पुस्तकहरु जोखिममा परेका हुन् ।

‘युनेस्कोको मेमोरी अफ द वर्ल्ड रजिष्टर’ मा सूचीकृत दुईमध्ये एक पुस्तक केशर पुस्तकालयमा राखिएका छन् । युनेस्कोले सन् २०१३मा केशर पुस्तकालयको ‘सुश्रुतासंहिता’ र राष्ट्रिय अभिलेखालयमा रहेको ‘निश्वासतत्वसंहिता’ लाई सूचीकृत गरेको थियो । दुवै पुस्तक नवाैं शताब्दीका हुन् । ३४ रोपनी क्षेत्रफल सहितको पुस्तकालय सन् १८९५ मा चन्द्र शमशेरले छोरा केशर शमशेरलाई युरोपियन शैलीमा बनाइदिएका थिए ।

यस पुस्तकालयमा हाल पुरातात्विक सामग्रीसहित हस्तलिखित ग्रन्थहरू समेत छन् । युनेस्कोले सूचीकृत गरेको सुश्रुसंहितासहित हस्तलिखित ग्रन्थहरू ६७५ थान, एक थान किताबी फर्मको क्याटलगसहित अहिलेसम्म वर्गीकृत नभएका केही हस्तलिखित ग्रन्थहरू समेत छन् ।