साविकको विजेता त्रिुभवन आर्मी क्लबलाई चार विकेटले हराउँदै एपीएफले प्रधानमन्त्री कप एक दिवसीय क्रिकेट प्रतियोगिताको उपाधि हासिल गरेकाे छ ।

कीर्तिपुरस्थित त्रिभुवन विश्वविद्यालयको क्रिकेट मैदानमा शनिबार आर्मीले प्रस्तुत गरेको एक सय ८० रनको लक्ष्य एपीएफले ३८.३ ओभरमा ६ विकेट क्षतिमा पूरा गरेको थियो । एपीएफका भुवन कार्कीले ८२ बलमा चार चौका र एक छक्का मद्दतमा ५५ रन जोड्दा सुमित महर्जनले ३४ रन जोडे । आर्मीका जितेन्द्र मुखियाले दुई तथा सोमपाल कामी र विक्रम सोबले समान एक विकेट लिए ।

आर्मीले गत संस्करणमा एपीएफलाई पनि हराउँदै उपाधि जितेको थियो । यसअघि टस हारेर ब्याटिङका लागि आएको आर्मीले ३९ ओभरमा सबै विकेट गुमाउँदै एक सय ७९ रनको योगफल खडा गरेको थियो ।

आर्मीका रोहित पौडेलले ५६ बलमा तीन चौका मद्दतमा ४९ रन जोडे । त्यस्तै जितेन्द्र मुखियाले २५ बलमा तीन चौका मद्दतमा अविजित २४ रन जोडे भने सुशन भारीले २५ बलमा दुई चौका मद्दतमा १९ रन जोडे । एपीएफका मौसम ढकाल र अमरसिंह रौटेलाले समान तीन तथा किशोर महतोले दुई विकेट लिए ।

विजेता एपीएफले उपाधिसहित १० लाख र उपविजेता आर्मीले पाँच लाख नगद पुरस्कार पाउनेछ ।

प्रकाशित समय : १८:०५ बजे