नेकपा (माओवादी केन्द्र)का उपमहासचिव तथा पूर्वअर्थमन्त्री वर्षमान पुनले नेपालको अर्थतन्त्र सीमित व्यापारिक घरानाको नियन्त्रणमा रहेको बताएका छन् ।

त्रिभुवन विश्वविद्यालय अर्थशास्त्र विभागमा भिजिटिङ प्रोफेसरका रूपमा विद्यार्थीलाई कक्षा लिने क्रममा उनले अर्थतन्त्रको ठूलो हिस्सा सीमित घरानाका मुठीमा रहनुले मुलुकको आर्थिक विकासमा चुनौती खडा गरेको बताए । नेपालमा अहिलेको लागि मिश्रित अर्थनीति नै राम्रो हुने बताए ।

राज्यले सकेसम्म एकाधिकार खालको पुँजीलाई नियन्त्रण कम गर्नुपर्ने उनकाे भनाइ थियाे । उनले भने, ‘मुलुकको अर्थतन्त्र एउटा सानो घेराले मात्रै सञ्चालन गरेर उनीहरुको स्वार्थमा अर्थमन्त्रीलाई सफल र असफल बनाउने खालको काम सानो समूहले खेल्छ भन्ने छ । तर त्यस्तो एकाधिकार हुनु हुँदैन। यसलाई प्रतिष्पर्धी नै बनाउनु पर्छ ।’ अवस्थामा निजी क्षेत्रलाई पुँजी निर्माण गर्न प्रेरित गर्नुपर्ने उनले बताए ।

उनले सरकारले पुँजीगत खर्च गर्न नसक्नु संरचनागत समस्या रहेको बताए । सरकारसँग १ लाख ३३ हजार निजामती कर्मचारीहरु भए पनि प्राविधिक कर्मचारी कम भएकाले समस्या रहेको बताए । नेपालको संरचनागत व्यवस्थालाई परिवर्तन गरेर पुँजीगत खर्च गर्नलायक संरचना बनाउन आवश्यक रहेको उनकाे सुझाव थियाे ।

सरकारले विकास निर्माणको कार्य हेर्ने छुट्टै निकाय आवश्यक रहेको बताए । अहिले सरकारले विकास निर्माणको काम सुरु गर्ने तर अदालतले रोक्दासमेत समस्या भएको उनले औंल्याए । समग्र नेपालको न्यायपालिका, व्यवस्थापिका, कार्यपालिका, नागरिक समाज सबैलाई विकासमैत्री बनाउन सरकारले पहल गर्नुपर्ने उनले धारणा राखे ।

प्रकाशित समय : १४:०१ बजे