धनगढीको सुदूरपश्चिमाञ्चल एकेडेमी(एसपीए) कलेज अमेरिकाको न्यूयोर्क शहरमा हुने ग्रीन कलेज अवार्ड-२०२२ को मनोनयनमा परेको छ ।

‘ग्रीन म्यान्टर्स’ नामक संस्थाले वातावरण संरक्षणका क्षेत्रमा काम गरेका विश्वभरका कलेजहरुबाट आवेदन आह्वान गर्दै उत्कृष्ट कलेजहरुलाई ‘ग्रीन क्लिन अवार्ड’ प्रदान गर्ने गर्छ । सोही अवार्डको मनोनयनमा नेपालबाट धनगढीको एसपीए कलेज परेको हो ।

‘आफ्नो अध्ययन–अध्यापन क्षेत्रबाट स्थानीय वातावरण संरक्षणमा यहाँहरुले खेलेको भूमिका निकै सह्रानिय छ । यहाँको योगदानको कदर गर्दै हाम्रो निर्णायक मण्डलले एसपीए कलेजलाई अवार्डको मनोनयनमा राख्ने निर्णय गरेको छ,’ । आयोजकले बधाई दिदैँ उक्त कुरा उल्लेख गरेको छ ।

ग्रीन कलेज अवार्ड आगामी सेप्टेम्बर २४ तारिखका दिन न्यूयोर्क शहरमा प्रदान गरिनेछ । मनोनयनमा परेका विश्वभरकै कलेजहरुको उक्त समारोहमा उपस्थिति रहने आयोजकले जनाएको छ ।

एसपीए कलेजका क्याम्पस प्रमुख योगराज उपाध्यायले एसपीए कलेज अन्तर्राष्ट्रिय कलेजका रुपमा उदाएको बताउँदै वातावरण संरक्षणमा विधार्थीहरुको भूमिका रहेको बताएका छन् । ‘यस सुन्दर निलो ग्रह(पृथ्वी) मानिस मात्रै नभएर अरु प्रजातीका लागि पनि उत्तिकै महत्वपूर्ण छ,’ क्याम्पस प्रमुख उपाध्यायले भने, ‘वातावरण संरक्षणमा एसपीए कलेजले खेलेको भूमिकाको सम्मानस्वरुप कलेज अन्तर्राष्ट्रिय अवार्डको मनोनयनमा परेको छ । यो हाम्रो र सबै सुदूरपश्चिमवासीका लागि गर्वको कुरो हो ।’