पोर्चुगिज स्टार क्रिस्टियानो रोनाल्डो आवद्ध युभेन्टसले लगातार नवौं सिजन इटालियन सिरी ‘ए’को उपाधि हासिल गरेको छ । घरेलु मैदान एलिएन्ज एरिनामा साम्पडोरियामाथि २-० को जित निकालेपछि दुई खेल बाँकी छँदै युभेन्टस सिरी ‘ए’ च्याम्पियन बनेको हो ।

युभेन्टसका लागि क्रिस्टियानो रोनाल्डो र फेडरिको बर्नरडेस्चीले गोल गरे । पहिलो हाफको इन्ज्युरी समयको थप गरिएको सातौं मिनेटमा रोनाल्डोले गोल गर्दै युभेन्टसलाई अग्रता दिलाए । ६७औं मिनेटमा फेडरिको बर्नरडेस्चीले गोल गर्दै युभेन्टसको अग्रता दोब्बर पारे ।

७७औं मिनेटमा साम्पडोरिया १० खेलाडीमा समेटियो । मिरालेम प्यानिचमाथि फउल गरेपछि रेफ्रीले मोर्टेन थोर्सवीलाई दोहोरो पहेँलो कार्ड देखाउँदै मैदानबाहिर पठाए । ८८औं मिनेटमा युभेन्टसले पेनाल्टी पाए पनि रोनाल्डोले सदुपयोग गर्न सकेन ।

च्याम्पियन बनेको युभेन्टसको ३६ खेलबाट ८३ अंक पुगेको छ । दोस्रो स्थानमा रहेको इन्टर मिलानको ७६ अंक रहेको छ । पराजित साम्पडोरिया ४१ अंक जोडेर १५औं स्थानमा रहेको छ ।

प्रकाशित समय : १९:२३ बजे