नेपाली पत्रकारहरुको अन्तर्राष्ट्रिय सञ्जाल इन्जाले पहिलो चरणको कार्यक्रमअन्तर्गत कोभिड १९ बाट प्रभावित ७० जना पत्रकारलाई लेखनवृत्ति प्रदान गर्ने भएको छ । इन्जाले कोरोनाको बहनामा जागिरबाट निकालिएका, बेतलबी बिदामा बस्न बाध्य पारिएका, काम गरेर पनि तलब नपाएका, पत्रकारिता क्षेत्रमै रहेर काममा नरहेका पत्रकारलाई लेखनवृत्ति प्रदान गर्ने निर्णय गरेको हो ।

इन्जाको वेबसाइट, सामाजिक सञ्जाल र अन्य माध्यममार्फत लेखनवृत्तिका लागि फाराम भर्न गत महिना आह्वान गरिएको थियो । सोही आह्वानअनुसार प्राप्त नामावलीबाट इन्जा एसियाको प्रस्तावमा इन्जा ग्लोबल बैठकले स्वीकृत गरेपछि प्रक्रिया अगाडि बढाइएको हो ।

इन्जा एसियाका अध्यक्ष एवं ग्लोबल उपाध्यक्ष वरिष्ठ पत्रकार टंक पन्तको अध्यक्षतामा बसेको सल्लाहकारसहितको बैठकले लेखनवृत्ति प्राप्त गर्ने पत्रकारले एक हप्ताभित्र फिचर आर्टिकल तयार गरिसक्नुपर्ने निर्णय गरेको छ । मुलुकको परिस्थितिलाई मध्यनजर गर्दै आर्थिक क्षेत्रमा परेको प्रभाव, सामाजिक न्याय, लैँगिक हिंसा, प्रेस स्वतन्त्रतामा परेको असर, स्वास्थ्य, शिक्षालगायतका विषयमा दुईवटा फिचर लेख्नुपर्नेछ ।

प्रकाशित समय : ०१:२४ बजे