विश्वका सबैभन्दा धनी व्यक्ति एलन मस्कले विश्वकै ठूलोमध्येको एक सोसल मिडिया कम्पनी ट्वीटर खरिद गरेका छन् । संसारभरिका नेता, सेलेब्रिटी र इन्फ्लुएन्सरहरूले बारम्बार चलाउने प्रभावशाली सामाजिक सञ्जाल ट्वीटर किनेका हुन् ।

उनले ५४.२० डलर प्रतिसेयर मूल्यमा कुल ४४ बिलियन डलर अर्थात, अहिलको विनिमय दरअनुसार ५३ खर्ब ६८ अर्बभन्दा बढी मुल्य तिरेर मस्कले ट्वीटर किनेका हुन् । एलन मस्कले केहीदिन अगाडि ट्वीटरको ९ प्रतिशत सेयर किनेका थिए । अब भने उनले ट्वीटरको सबै सेयर किनेका हुन् ।

ट्वीटरको इन्डिपेन्डेन्ट बोर्डका अध्यक्ष ब्रेट टेलरले भनेका छन्, ‘ट्वीटर बोर्डले मूल्य, निश्चितता र वित्तपोषणमा एलन मस्कको प्रस्ताव गम्भीरतापूर्वक आँकलन गर्यो । सम्झौतापछि ट्वीटरको सबै सेयर होल्डर्सलाई क्यासमा आकर्षक प्रिमियम प्राप्त हुने छ जसबाट सेयरधनीलाई फाइदा हुने छ । हामीलाई लाग्छ ट्वीटरको सेयर होल्डरका लागि यो राम्रो अवसर हो ।’

ट्वीटरका सीईओ पराग अग्रवालले ट्वीटरको एक उद्देश्य प्रासंगिकता भएको र यसले दुनियालाई प्रभावित पार्ने उल्लेख गरेका छन् । उनले भनेका छन्, हामीलाई हाम्रो टिममा गर्व छ ।’

यसैगरी ट्वीटर कम्पनीका नयाँ मालिक एलन मस्कले वाक स्वतन्त्रता लोकतन्त्रको मुख्य अधिकार भएको उल्लेख गर्दै भनेका छन्, ‘ट्वीटर यस्तो डिजिटल टाउन हो जहाँ मानवताको भविष्यका लागि विभिन्न मुद्दामा बहस हुन्छ । ट्वीटरमा जबरजस्त क्षमता छ ।’ ट्वीटर कम्पनीमा काम गर्न उत्सुक रहेको भन्दै उनले यसमा नयाँ सुविधा थपेर पहिलेभन्दा राम्रो बनाउन कोसिस गर्ने बताएका छन् ।

टेस्ला र स्पेस एक्सका मालिकले अनलाइन प्लाटफर्महरूमा अत्यधिक संयमता (एक्सेसिभ मोडरेसन) अपनाइने गरेको भन्दै त्यसको आलोचना गर्ने गरेका थिए ।

अन्तर्राष्ट्रिय मिडियाहरूले जनाएअनुसार मस्कले अब ट्वीटरका बट एकाउन्ट हटाउनुका साथै विज्ञापनहरूमा पनि कटौती गर्नेछन् । हाल ट्वीटरले आफ्नो ९० प्रतिशत राजश्व विज्ञापनबाट प्राप्त गर्ने गरेको छ । कम्पनी निजिकरण हुने भएपछि विज्ञापनबाट आउने आम्दानी बढाउन अब कुनै शेयरधनीबाट दबाब हुने छैन ।

मस्कले ट्वीटर सब्स्किृरप्सन मोडल (ग्राहक बनाउने) मा जानुपर्ने बताउने गरेका छन् । गत वर्षदेखि नै ट्वीटरले त्यो मोडलमा केही अभ्यास थालेको पनि थियो । ट्वीटर ब्लु सार्वजनिक गरेर प्रतिमहिना २.९९ डलरमा प्रिमिमय सेवा लिन सकिने सुविधा ट्वीटरले दिएको छ ।