मेगा बैंकले नेपाल लिमिटेड (Megha)ले आफ्नो मोबाइल बैंकिङ एपमा नेपाल क्लियरिङ हाउस ९एनसीएचएल० को नेपाल पे क्यूआर इन्टिग्रेटेड गरेको छ । बैंकले आफ्ना ग्राहकलाई नेपाल पे क्यूआर स्क्यान गर्न तथा त्यसमार्फत अनलाइन भुक्तानी गर्न सक्ने सुविधाका लागि मोबाइल बैंकिङ एपमा यो सेवा थप गरेको हो । यससँगै बैंकका ग्राहकले नेपाल पे क्यूआरमा रहेका विभिन्न मर्चेन्ट र पेमेन्ट गेटवेमा सहजै अनलाइन भुक्तानी गर्न सक्नेछन् ।

नेशनल पेमेन्ट स्वीचमा सहभागी भएर नेपाल पे क्यूआर इनेबल गर्नेमध्येहरुमध्ये मेगा बैंक पनि पहिलो भएको बैंकले जनाएको छ । बैंकका व्यवसायिक ग्राहकहरु नेपाल पे क्यूआरको मर्चेन्टको रुपमा आफुलाई आबद्ध गराएर उपभोक्ताहरुलाई पनि उक्त बैंकिङ एप प्रयोग गराई भुक्तानी गराउन सक्नेछन् । बैंकले नेपाल पे क्यूआरलाई थप विस्तार गर्दै लैजाने जनाएको छ ।

नेपाल पे क्यूआर नेपाल क्लियरिङ हाउस लिमिटेड (एनसीएचएल)ले कार्यान्वयन ल्याएर सञ्चालन गरिरहेको छ । नेपाल क्लियरिङ हाउसले कार्यान्वयनमा ल्याएको नेशनल पेमेन्ट स्वीच अन्तर्गत नेपाल-क्युआर स्ट्यान्डर्ड अनुसारको क्युआर अन्तर-आबद्धता कायम गर्ने गरी ‘नेपाल पे क्यू आर’ सञ्चालनमा ल्याइएको हो ।

क्यू आर स्कीमको रुपमा पनि उपलब्ध रहेको उक्त ’नेपाल पे क्यू आर’ ले मर्चेन्ट वा नेटवर्क लेभलमा अन्तर–आबद्धता कायम गर्न सक्ने व्यवस्था रहेको छ । यसरी अन्तर आबद्धता कायम गर्न सकिने हुँदा उक्त ‘नेपाल पे क्यू आर’ले नेपालमा क्यू आर बाट हुने भुक्तानीलाई थप प्रवर्धन र सहज गर्ने अपेक्षा गरिएको छ । हालसम्म हिमालय बैंक, माछापुच्छ्रे बैंक, सानिमा बैंक र समृद्धि फाइनान्स लगायतका मोबाइल एपबाट क्यू आर स्क्यान गरी कारोबार गर्न सकिने छ ।

सरकारको राजस्व भुक्तानी समेत क्यू आर बाट गर्न मिल्ने गरी एनसीएचएलले उपलब्ध गराउँदै आएको पेमेन्ट गेटवेमा समेत ‘नेपाल पे क्यू आर’ गत फागुनदेखि थप गरिएको थियो । मेगा बैंकले २०७ शाखा, २५ एक्स्टेन्सन काउन्टर, ६० वटा शाखारहित बैंकिङ र १४० एमटीएमबाट वित्तीय सेवा दिँदै आएको छ ।