ग्लोकल प्रालिद्वारा आयोजित 'ग्लोकल टीन हिरो २०२१'को  उपाधि काठमाडाैंका प्राञ्जल चालिसेले जित्न सफल भएका छन् । शिक्षा, उद्यमशीलता, कूटनीति, एवं अन्य विविध क्षेत्रका व्यक्तित्वहरुको उपस्थितिमा बुधबार अनलाइन कार्यक्रमकोबीच ग्लोकल टीन हिरो नेपाल, २०२१ को घोषणा गरिएको हो ।

किशोरकिशोरीहरुमा भएको प्रेरणा र उत्साहलाई प्रस्फुटन गरी उनीहरुले समाजमा गरेको प्रभावकारी कार्यलाई कदर र अरुमाझ चिनाउने कार्यक्रम 'वाइ वाइ ग्लोकल टिन हिरो' नेपालको यो सातौं संस्करण हो । वाइ वाइ ग्लोकल टिन हिरोका अन्तिम ६ प्रतिस्पर्धी अनुराग चापागाईं, (युट्युबर), दीपक सुतिहार (सामाजिक उद्यमी), खुस्बु भण्डारी (वन्यजन्तु संरक्षणवादी), नेहा गुरुङ (सामाजिक अभियन्ता) र प्राञ्जल चालिसे (टेक्नोप्रेनर)बीच प्रतियोगिताको विजेता चयन गरिएको थियो ।

प्राञ्जलले दृष्टि नेपालको आविष्कार गरी दृष्टिविहीन समुदायलाई मुद्रा बिल पहिचान र नगद लेनदेनमा मद्दत गरिरहेका छन् । त्यस्तै उनले कृषि समाचार र प्रामाणिक स्रोतहरुबाट जानकारी प्रदान गर्ने एक मोबाइल एप निर्माण गरेका छन् । जसबाट किसानहरुलाई मद्दत मिलेको छ । महिलाहरुको सुरक्षा सुनिश्चित गर्न एवं सुरक्षाका कारण अवसरबाट वञ्चित हुन नपरोस् भन्नका लागि उनले एक महिला सुरक्षा एप पनि निर्माण गरेका छन् । उनको अन्य दुई शैक्षिक एपहरु छन् । जसमा ७५०० प्रयोगकर्ताहरु छन् । प्राञ्जलले एक गैर नाफामुखी टेक्नोलोजी उद्यम 'ई-शिक्षिका नेपाल' को सुरुवात गरेका छन । जसले अनलाइन शिक्षाको गुणस्तर बढाउने तथा शैक्षिक स्रोतहरुलाई अझ सुलभ बनाउन मद्दत गर्दछ । उनी नेपाल फाउन्डेसन इनिसिएटिभ बोर्डको सदस्य हुन् । हाल उनी ब्लकचेन टेक्नोलोजी र स्मार्ट ठेक्काहरु र टेक्नोलोजिकल उन्नतिले विस्तारित लेनदेन प्रक्रियाहरुको लागतलाई कम गर्नको लागि के गर्न सकिन्छ भन्ने अनुसन्धानमा काम गरिरहेका छन् ।

देशभरीका किशोरकिशोरीहरुबाट कुल ६११ आवेदन आएकोमा बुधबार ग्लोकल टीन हिरो उपाधिबाट सम्मानित गरिएको हो । यी किशोरकिशोरीहरु समाजसेवा, बालअधिकार, खेलकुद, कृषि, मिडिया, पत्रकारिता, विज्ञान, प्रविधि र उद्यमशीलता, वातावरण संरक्षणजस्ता विविध क्षेत्रमा काम गरेर सकारात्मक सन्देश प्रवाह गरिरहेका छन् । समाजमा रहेका असाधारण युवाहरुको पहिचान र सम्मान गर्ने उद्देश्यले कार्यक्रम आयाेजना गरिएकाे थियाे ।

यस वर्षको निर्णायक टोलीमा युरोपियन युनियनका राजदूत नोना डेप्रेज, गोल्डस्टारको मार्केटिंङ, ब्रान्डी र व्यवसाय विकास निर्देशक विधुसी राणा, सीजी कर्प ग्लोबलका प्रबन्ध निर्देशक वरुण चौधरी, नेपालका लागि कोका-कोला कम्पनीका कन्ट्री निर्देशक आदर्श अवस्थी र ज्योति ग्रुप अफ कम्पनीका निर्देशक र स्याकर ट्रेडिङ कम्पनीका अध्यक्ष सौरभ ज्योति रहेका थिए । यस वर्षको अन्तिम ६ प्रतिस्पर्धीले क्षमता विकास कार्यशालामा सहभागी हुने अवसर प्राप्त गरेका थिए । अन्तिम ६ प्रतिस्पर्धीको कामको सुरुवात र प्रभावको आधारमा र व्यक्तित्व मापदण्ड, ज्ञान र दुरदर्शनको मापनको लागि अन्तर्वार्ता भएको थियो ।