दया फाउण्डेशनले विभिन्न सामुदायिक तथा सरकारी अस्पताललाई चिकित्सा उपकरण प्रदान गरेको छ । फाउण्डेशनले देशमा व्याप्त कोरोना महामारीको संक्रमणको उपचारको क्रममा खडा भएका चुनौती तथा समस्याको समाधानमा राहत पुर्‍याउने उद्देश्यले उक्त उपकरण प्रदान गरेका हुन् ।

यस संस्थाले टेकु अस्पताल, वीर अस्पताल, ट्रमा सेण्टर, क्षेत्रपाटी निःशुल्क चिकित्सालय, भक्तपुर क्यान्सर अस्पताल, त्रिवि शिक्षण अस्पताल, पाटन अस्पताल, नेपाल एम्बुलेन्स सर्भिस र आनन्द कुटी आइसोलेशन सेण्टरलाई चिकित्सा उपकरण प्रदान गरेको छ । जसअन्तर्गत ६ थान हाई फ्लो नेशल क्यानुला, ५ थान ५ लिटरको अक्सिजन कन्सन्ट्रेटर, १० थान १० लिटरको अक्सिजन कन्सन्ट्रेटर, १५ थानथर्मल गन, १५ थान अक्सिमिटर साथै १ हजार थान सुरक्षा किट (पीपीई, फेससिल्ड, सेनिटाइजर, मास्क, पञ्जा) छन् ।

कोभिड-१९ को कारणले सिंगो राष्ट्र स्वास्थ्य संकटमा परेको यस विषम घडीमा आफ्नो संस्था सक्रिय रुपमा अगाडि बढी थोरै नै भएपनि सहयोग गर्न पाएकोमा फाउण्डेसनका अध्यक्ष राजेश प्रधानले खुशी व्यक्त गरे । संस्थाले सहयोग गरेको अस्पताल विशेषत निम्न आयवर्ग भएकाको उपचारको लागि लक्षित भएको हुँदा यस सहयोगले विपन्न वर्गको कोभिड-१९ को उपचारमा टेवा पर्‍याउने उनले विश्वास प्रकट गरे ।

यस फाउण्डेशनले क्रिटिकल केयर नर्सिङ संघ नेपाल र नेपाल क्रिटिकल केयर विकास फाउण्डेशनसँगको सहकार्यमा क्रिटिकल केयर नर्सिङसम्बन्धी भर्चुयल प्रशिक्षण कार्यक्रम सञ्चालन गरिरहेको छ । साथै कोरोना उपचारका क्रममा आवश्यक विशेष सीप नर्सलाई उपलब्ध गराउने उद्देश्यले गत जेठ ९ गते थालिएको प्रशिक्षण जेठ २१ गते सम्म जारी रहने फाउण्डेसनले जनाएको छ ।