कर्णाली प्रदेश सरकारमा तीन मन्त्री नियुक्त भएका छन् भने दुई जनाले राजीनामा दिएका छन् । बुधबार मुख्यमन्त्री महेन्द्रबहादुर शाहीले मन्त्रिपरिषद् पुनर्गठन गरेका हुन् । यसअघि २०७४ माघमा नियुक्त भएका मन्त्रीद्वय बिमला केसी र नरेश भण्डारीलाई हटाएर माओवादी केन्द्रका तीन जनालाई मन्त्रीमा नियुक्त गरिएको हो ।

मुख्यमन्त्री कार्यालय स्रोतकाअनुसार मन्त्रीमा नियुक्त हुनेमा सुर्खेतका विन्दमान बिष्ट र सीता नेपाली तथा रुकुम पश्चिमका गोपाल शर्मा छन् । विष्टलाई आन्तरिक मामिला तथा योजना मन्त्रालय, नेपालीलाई भौतिक पूर्वाधार विकास मन्त्रालय फुटाएर जलश्रोत मन्त्रालय र शर्मालाई आर्थिक मामिला तथा योजना मन्त्रालयको जिम्मेवारी दिएको मुख्यमन्त्री कार्यालय स्रोतले जानकारी दिएको हो ।

बुधबार बसेको मन्त्रिपरिषद्को बैठकमा सरकारका प्रवक्तासमेत रहेकी केसी र मन्त्री भण्डारीले राजीनामा दिएका थिए । बैठकमा नै मुख्यमन्त्रीले दुवै मन्त्रीको राजीनामा स्वीकृत गरेर नयाँ मन्त्री नियुक्त गरेका हुन् । मुख्यमन्त्रीका राजनीतिक सल्लाहकार भीमप्रकाश शर्माका अनुसार मन्त्री नियुक्तिबारे औपचारिक जानकारी केही बेरपछि आउने बताए । उनकाअनुसार नवनियुक्त मन्त्रीलाई आजै सपथ खुवाउने तयारीमा मुख्यमन्त्री कार्यालय जुटेको छ ।