न्युजकारोबार संवाददाता
दैलेख, पुस ८–अनौपचारिक सेवा केन्द्र इन्सेकले दैलेख जिल्लाको प्रतिवेदन सार्वजनिक गर्दै दैलेखमा महिला र बाल अधिकार हनन्का घटना तुलनात्मकरुपमा धेरै रहेको उजागर गरेको छ ।
दिक्तेलमा एक कार्याक्रम आयोजना गरी प्रतिवेदन सार्वजनिक गरिएको हो । इन्सेकको प्रतिवेदन अनुसार जिल्लामा ३३ वटा महिला अधिकार हनन् सम्बन्धी घटना भएको जनाएको छ ।
साथै, बाल अधिकार हनन्का १३ घटना भएको प्रतिवेदनमा उल्लेख छ । त्यस्तै एक जनामा बलात्कार, एक जनामा बलात्कारपछि बेचबिखन, दुई बलात्कारको प्रयास, आठ बहुविवाह, १० घरेलु हिंसा तथा ११ अन्य प्रकारले महिलामाथि दुव्र्यवहार भएको जनाइएको छ ।

सन् २०१७ जनवरीदेखि डिसेम्बर १५ भरी जिल्लामा संकलित मानवअधिकार ज्यादतीका ६९ घटनामध्ये बालअधिकार हननमा १२ बालिका र एक शिशु पीडित बनेको इन्सेक प्रतिनिधि सुनिता मगरले जानकारी दिइन् । बालअधिकार हननमा आठ बालिका बलात्कार तथा चार बालिकामाथि यौनजन्य दुव्र्यवहार भएको जनाइएको छ ।

घटनाको प्रकाशनपूर्व सरोकारवाला निकायसँग गरिएको समीक्षा कार्यक्रममा जिल्लामा नौ जनाको हत्या भएको बताइएको छ । त्यस्तै बम विस्फोटबाट एक जना घाइते बनेको तथा कुटपिटबाट आठ जना घाइते बनेको जनाइएको छ ।

सम्पत्तिमाथिको अधिकारअन्तर्गत सो वर्ष पाँच घटनामा चार जना पीडित हुन पुगेका छन् । तिनमा सार्वजनिक भवनमा आगजनी र चार व्यक्तिको सम्पत्ति कब्जा गरेको भनी आतंकित बनाइएको पाइएको छ । कार्यक्रममा जिल्लामा हुने कतिपय गम्भीर प्रकृतिका घटना सार्वजनिक नहुँदा पीडकले उन्मुक्ति पाउने गरेको अधिकारकर्मीले बताए ।

प्रकाशित समय : ११:१३ बजे