भक्तपुर सूर्यविनायक घर भएका विदुर घतानी एक नीजि कम्पनीको माथिल्लो तहमै कार्यरत छन् । आम्दानी पनि मासिक ४० हजार रुपैयाँभन्दा बढी नै छ । उनको पारिवारिक पृष्ठभूमि पनि सम्पन्नशाली छ । तर पनि नेपालमा भविष्य नदेखेका उनी आफ्नो भविष्य विदेशतिरै खोजिरहेका छन् । यसका लागि उनको रोजाइमा युरोपेली मुलुक क्यानाडा पर्यो । त्यसैले उनले क्यानडाका लागि वर्किङ भिसा लगाउन प्रयास गरे । नभन्दै काठमाडौँको बसुन्धारास्थीत एचआर सोलुसनसँग उनको सम्पर्क भयो । १७ महिना पहिले बसुन्धारास्थित रोयल एचआर सोलुसनमा पुगेपछि त्यहाँ कृष्ण सिकेसँग विदुरको भेट भयो ।

सिकेले महिनाको ३ लाखसम्म आम्दानी हुँने भन्दै क्यानडाका लागि अवसरहरु सुनाए । वर्किङ भिसामा उड्न पाउने भएपछि विदुर त्यसै पनि खुसीले गद्गद् भए । सिकेले विदुरलाई यत्तिसम्म विश्वस्त पारे कि विदुरले ६ लाख रुपैयाँ पैसा पहिलो भेटमै सिकेलाई दिए । हट्टाकट्टा, मिजासिलो र नरम बोली भएका कृष्ण सिकेले विदुरलाई पहिलो भेटमै पट्ट्याए । तर, १७ महिना बितिसक्दा पनि एक दुई दिनमै क्यानाडा उड्ने आश्वासन पाएका विदुर नेपालमै छन् । अब उनी आफूभन्दा पनि उनको क्यानाडा उड्ने सपनाचाहिँ उड्न थालेको छ ।

विदुर मात्रै होइन झण्डै २ सय ५० जना युवाहरु यसरी नै कृष्ण सिकेको जालमा परेका छन् । ठगिनेहरु प्राय सबैले क्यानडाका लागि अप्लाई गरेका थिए । कृष्णले यी युवाहरुबाट २ लाख देखी ६ लाख रुपैयाँ सम्म लिएका छन् । पीडितहरुले सिकेलाई पैसा दिएको रसिद देखाउँदै भनेका छन्, ‘नराम्रोसँग सिकेको जालमा परियो ।’ पीडित गोविन्द रेग्मीले भने, ‘हामी ठगिदै छौँ भन्नेबारे सिकेले एउटा पनि आशंकायुक्त व्यवहार गरेन । उनको बोलि नै मीठो थियो, व्यवहार त्यस्तै शालीन थियो ।’

सिकेले दुई तीन जनाको मात्रै कोटा छ भन्दै विभिन्न राष्ट्रिय दैनिकहरुमा विज्ञापन दिने गरेका थिए । त्यही विज्ञापनको आधारमा धेरैले कृष्ण सिकेसँग सम्बन्ध बढाए । उनको शब्द जालमा परेर पैसा पनि दिए तर विदेश उड्न नपाएपछि अहिले यी युवा आफ्नो मोटो रकम सम्झदै भुमरीमा फसेको अनुभुति गरिरहेका छन् । पीडितमध्ये अधिकांश मिडियामा आउन समेत डराइरहेका छन् । घर परिवारलाई परिवारलाई थाहै नदिइ पैसा दिएर भिसा अप्लाई गरेका उनीहरु ठगिएको थाहा पाएपछि छाँगाबाट खसे सरह भएका छन् । ठगिएको कुरा आफन्तले थाहा पाए इज्जत जाने भन्दै भन्दै कतिपय त मर्नु न बाँच्नुको अवस्थामा पुगेको बताउँछन् ।

जब सिके अफिस पनि बन्द गरेर फरार भए, तब ठगिएको चाल पाए यी युवाहरुले । कृष्ण सिके कहाँ छन्, पीडित कसैलाई पत्तो छैन । भाइबरमा मात्रै कुरा गर्ने उनले युवाहरुलाई अब केही दिनमै उड्नुहुन्छ भन्दै आश्वासन दिन छाडेका छैनन् । सिकेलाई ९८५१०२०१८५ नम्बरमा भाइबरमा मात्रै सम्पर्क हुन्छ । भाइवरमा कुरा हुँदा प्रहरीमा नजान भन्दै सिकेले पीडितलाई उनले आग्रह गर्ने गरेका छन् । विदेश उड्नु त परको कुरा डुबेको पैसा फिर्ता गराइदिनुपर्यो भन्दै पीडितहरु प्रहरीको सहयोग माग्न पुगेका छन् । पीडितहरुले सिकेविरुद्ध महानगरीय अपराध महाशाखामा उजुरी दिएका छन् ।

बारम्बार प्रहरीलाई दबाब दिएपछि प्रहरीले कृष्ण सिकेको श्रीमतीलाई नियन्त्रणमा लिएको छ । तर, उनकी श्रमतिले कृष्णसँग सम्बन्ध विच्छेद भइसकेको भन्दै उनको बारेमा केही थाहा नभएको बताएकी छन् । तर, पीडितहरु भने यो कुरा मान्न तयार छैनन् । श्रीमान–श्रीमतीको सेटिङमै डिभोर्सको नाटक भएको पीडित विदुर घतानीको दाबी छ । यता, प्रहरीले भने यसबारे उजुरी परेकोका लागि अनुसन्धान भइरहेको जनाएको छ । अब पीडितहरुले पैसा उकास्न प्रहरीको भर परेको बताएका छन् ।

यसरी चलाउँथे सिकेले कम्पनी

कृष्ण सिकेले कोरल एजुकेसन प्रालि नयाँ बानेश्वरमा राखेका थिए । यहाँबाट झण्डै १ सय जनाले क्यानडाका लागि प्रक्रिया अघि बढाएका थिए । २ लाख देखि ६ लाखसम्म ती व्यक्तिहरुबाट उनले उठाएका छन् । तर, एकाएक बैशाख मसान्तमा यो कार्यालय हटाइयो । ढोकामा सूचना टाँसियो । सूचनामा भनिएको छ, ‘कार्यलय सार्न पर्ने भएकाले कार्यालय बन्द छ । एक हप्तामा नयाँ स्थानमा कार्यालय रहनेछ । जेठ ७ गतेसम्म कार्यालय बन्द रहने’ भनिएको छ । तर, असार लाग्दासमेत यो अफिसको अत्तोपत्तो छैन । ‘सूचना पनि त्यस्तै छ, एकहप्तामा नयाँ स्थानामा कार्यालय हुनेछ ।’

सिके कै अर्काे पनि कम्पनी छ । बसुन्धाराको नविल बैंकको सवैभन्दा माथिल्लो तल्लामा रोयल एच आर सोलुसन पा.लि. । अमेरिका, क्यानडा, अष्ट्रेलिया, न्युजल्याण्ड र युरोपियन देशहरुमा वर्किङ भिसा लगाइदिने भन्दै रोयल एच आर सोलुसनले युवाहरु ठग्दै आएको छ । अझैपनि कतिपय युवाहरु यसरी नै ठगिने गरेको अनुमान प्रहरीको छ । किनकि, यी कम्पनिहरु चलाउन उनले आफ्नो श्रीमति र छोरीलाई समेत परिचालन गरेका छन् ।

प्रकाशित समय : १३:५४ बजे