सुर्खेत– कर्णाली प्रदेश संसद बैठक बिहीबारदेखि नै अवरुद्ध भएको थियो । प्रमुख प्रतिपक्षी दलका सांसद जीवनबहादुर शाहीले ‘सरकारले रातो किताब किन ननिकालेको ?’ लगायतका प्रश्न उठाउँदै बैठक अवरुद्ध गरेका थिए ।
प्रतिपक्षीले संसद चल्न नदिने भन्दै रोस्ट्रम घेरेपछि आधा घण्टाका लागि बैठक स्थगित गरियो तर पछि पुनः बैठक सञ्चालन हुन सकेन । कर्णाली प्रदेशसभाको दोस्रो अधिवेशनको दशौं बैठकमा प्रमुख प्रतिपक्षीले उठाएका प्रश्नको जवाफ दिँदै अर्थमन्त्री प्रकाश ज्वालाले रातो किताब बजेट कार्यान्वयन हुन नसकेकाले नआएको जवाफ दिए । ‘हामी सिक्दै छौं । कर्णाली सरकारले असार अन्तिममा बजेट सक्ने प्रवृत्तिको अन्त्यको योजना राखेको छ,’ उनले भने, ‘हतारमा ल्याएको आर्थिक वर्ष २०७४÷७५ को बजेट कार्यान्वयन नहुने भएपछि रातो किताबको अर्थ नभएकाले हामीले रातो किताब नल्याएका हांै ।’
शाहीले कर्णाली रारा पर्यटन वर्षका खर्चको विवरणसमेत माग गरेका थिए । रारा पर्यटन वर्षको खर्चसमेत अर्थमन्त्री ज्वालाले संसदमा सार्वजनिक गरिसकेका छन् । कर्णाली रारापर्यटन वर्षको खर्च विभिन्न शीर्षकमा ६३ लाख ८१ हजार ७ सय ९५ रुपैयाँको विवरण बैठकमा प्रस्तुत गरिएको थियो ।
सांसदहरुले जनप्रतिनिधिको हत्यारालाई कारबाहीको मागसमेत गरेका छन् । गत जेठ १९ गते राति नरहीनाथ गाउँपालिका–९, कालीकोटकी वडा सदस्य मना सार्कीको हत्या भएको थियो । मनाको हत्यामा संलग्नलाई सरकारले छानबिन गरी यथासक्य कारबाही गर्न सांसदहरुले सरकारसँग माग गरे । बैठकको विशेष समयमा सांसद कौशिलावती खत्रीले जनप्रतिनिधिको सुरक्षाको ग्यारेन्टी सरकारले गर्नुपर्ने बताइन् । ‘कालीकोटमा जनप्रतिनिधिको बीभत्स हत्या भएको छ । त्यसप्रति हामी जनप्रतिनिधि स्तब्ध भएका छौं । अब सरकारले जनप्रतिनिधिको सुरक्षाको ग्यारेन्टी लिनुपर्छ,’ उनले भनिन् ।
सांसदहरु अम्मरबहादुर थापा र कर्मराज शाहीले पनि मना सार्कीको हत्यारालाई हदैसम्मको कारबाहीको माग गरे । सांसद दानसिंह परियारले मना सार्कीको हत्यारालाई कारबाही गरी मृतकलाई सहिद घोषणा गर्न कर्णाली सरकारसँग माग गरे ।
सांसद पद्मा खड्काले महिलाहरु अहिले पनि असुरक्षित भएको भन्दै जातीय विभेदपूर्ण ढंगबाट मनाको हत्या भएकाले दोषीलाई कडा कारबाही हुनुपर्ने माग गरिन् । संसदमा बोल्ने सबै सांसदहरुको प्रमुख एजेन्डा नै बन्यो– मना सार्कीको हत्याकाण्ड । गत जेठ १९ गते राति करिब ८ बजेतिर पानी छोएको भन्दै हत्या गरेको आरोपमा दुई युवतीलाई मृतकका छोराले किटानी जाहेरी गरेका छन् ।
कर्णाली सरकारले शुक्रबार सरकारको नीति तथा कार्यक्रम प्रस्तुत गर्ने भनिए पनि विभिन्न कारणवश शनिबार (आज) मात्र नीति तथा कार्यक्रम प्रस्तुत गर्ने कार्ययोजना रहेको संसद सचिवालयले जानकारी दिएको छ ।

प्रकाशित समय : १७:०३ बजे