उदयपुरको बेलका नगरपालिकामा १३ वर्षीय बालकले झुण्डिएर आत्महत्या गरेका छन् । बेलका नगरपालिका वडा नम्बर ४ डाँडाटोलका लिला आचार्यका १३ वर्षीय छोरा हिरा आचार्यले आफ्नै घरको बरण्डामा झुन्डिएर आत्महत्या गरेका हुन् । बिहीबार साँझ ६ बजे हिरा घरको उत्तर–पश्चिम बरण्डामा सनपटुवाको दाम्लोमा झुन्डिएको अवस्थामा फेला परेका सो वडाका वडा अध्यक्ष दीपक दंगालले जानकारी दिए ।

हिरा कक्षा ६ मा अध्ययनरत थिए । हिराका बुवा पुस्तक र पात्रो विक्रेता हुन् । उनी कामको सिलसिलामा बेल्टार गएका थिए । हिराकी आमा पनि घर बाहिर थिइन् । घरमा हिरा र उनकी दिदीमात्रै थिए । साँझ एकछिन पढेर आउँछु भनेर घरमाथि गएका हिरा झुन्डिरहेको अवस्थामा देखिएपछि उनकी दिदीले अतालिएर सबैलाई बोलाइन् । अहिले मुचुल्का उठाउने काम भइरहेको वडा अध्यक्ष दंगालले बताए । घटनाबारे थप अनुसन्धान भइरहेको इलाका प्रहरी कार्यालय रामपुरले जनाएको छ ।

प्रकाशित समय : ०२:०५ बजे