कास्कीका दुई युवा रोजगारीका लागि दक्षिण कोरिया पुग्ने लोभमा लाखौं ठगिएका छन् । कास्कीको माछापुच्छ्रे गाउँपालिका–२, चिप्लेटीका नारायण भण्डारी र अमर विक कोरिया पुग्ने लोभमा ठगिएका हुन् । कोरिया पठाइदिने भन्दै कास्की ल्वाङ घलेलका ४६ वर्षीय ओम तामाङले साढे पाँच लाख रकम लगेको उनीहरुले बताएका छन् ।

तामाङले कोरिया पठाइदिन्छु भनेर दुई वर्षअघि ५ लाख ५० हजार रुपैयाँ भण्डारी र विकले बताएका छन् । तामाङलाई विकले नेपाली कागजमा भर्पाई गरी ३ लाख रुपैयाँ बुझाएको पाइएको छ भने भण्डारीले दुई किस्ता गरी २ लाख ५० हजार दिएका छन् ।

पहिलो ६ महिनामा केरियाको भिसा बिग्रेको भन्दै उनीहरुलाई आलटाल गर्दै हिँडेका तामाङले एक वर्षयता कोरिया लैजान नसक्ने प्रतिक्रिया दिँदै आए पनि लगेको रकम फिर्ता नगरेको ठगिएका युवाले बताए । तामाङले भने आफू परिबन्धमा मात्र परेको तर युवाको रकम नठगेको बताए । ‘अबको १९ दिनभित्र साँवा–ब्याज फिर्ता गरिदिन्छु,’ उनले भने, ‘मामाबाट आउने पैसा नआएर हो, आउनेबित्तिकै पठाइदिन्छु ।’ आफूले दुई जनालाई विगतमा कोरिया पठाएको पनि उनले दाबी गरे ।

प्रकाशित समय : २३:४४ बजे