मलेसियामा विषाक्त रक्सी सेवनका कारण १९ जनाको मृत्यु भएको छ । मृत्यु हुनेमा चार जना नेपाली रहेको मलेसियास्थित नेपाली दुतावासले जनाएको छ ।

मलेसियाको स्वास्थ्य मन्त्रालयका अनुसार मंगलबार बेलुकासम्म ५१ जना बिरामी परेका छन् । १४ जना गम्भीर बिरामी परेका छन् । उनिहको उपचार जारी छ । मृत्यु भएकामध्ये तीन मलेसियन नागरिक छन् भने अन्य नेपाल, बंगलादेश, म्यानमार र भारतका नागरिक रहेको बताइएको छ ।

दुतावासका अनुसार विषक्त रक्सीले धादिङ गंगाजमुना गाउँपालिका ६ बरेरीका २४ वर्षीय विकास घलेको सनाखत भएको छ भने, विकास विशाल बुढाथोकी र सञ्जय उरावको पहिचान खुलेको छ । एकजनाको भने सनाखत हुन सकेको छैन । कडा प्रकारको रक्सी सेवनका कारण धेरै जनाको ज्यान गएको हो ।

मलेसियाको स्वास्थ्य विभागले गरेको अनुसन्धानमा बिरामीले क्वालम्पुरको एक ठाउँबाट धेरै समयदेखि रक्सी किन्ने गरेको खुलेको तर, सो रक्सीमा कस्तो प्रकारको विषाक्त पदार्थ मिसाइएको भन्ने विषय भने अझै खुल्न सकेको छैन । मलेसियन प्रहरीले घटनाको अनुसन्धान गरिरहेको बताइएको छ ।

बिरमीसँग लिइएको जानकारीअनुसार उनीहरुले तीख प्रकारका रक्सी किनेका थिए । किंगफिसर बियर, ग्राण्ड रोयल ह्विस्की र मण्डले ह्विस्की । मलेसिया क्वलालम्पुर क्षेत्रका विभिन्न उद्योग कलकारखानामा काम गर्ने मजदुरहरुले सोमबार सार्वजनिक बिदाको मौकामा रक्सी सेवन गरेका थिए ।

विषाक्त रक्सीका कारण ‘मेथानोल पोइजनिङ’ भएको र श्वासप्रश्वासमा समस्या, पेट दुख्ने, वान्ता हुने, टाउको दुख्ने, रिँगटा लाग्ने लगायतका समस्या देखिएका छन् ।

प्रकाशित समय : १३:३८ बजे