दोस्रो कोमिक कोन नेपाल कार्यक्रम सेप्टेम्बर १५ मा आयोजना हुने भएको छ । पहिलो कोमिक कोन नेपाल २०१७ सेप्टेम्बरमा ललितपुरको झम्सिखेलमा भएकोे थियो ।

पश्चिमी संस्कृतिबाट आएको कोमिक कोनको अवधारण अहिले विश्वभर लोकप्रिय बन्दै गएको छ । कोमिक कोनले विभिन्न सांस्कृतिक पृष्ठभूमि भएका व्यक्तिलाई प्रतिभा प्रस्तुत गर्ने अवसर प्रदान गर्छ ।

राजधानीमा शनिबार आयोजित कार्यक्रममा कोमिक कोन नेपालका सञ्चालक सृष्टि श्रेष्ठले व्यक्तिमा लुकेर रहेको कला र प्रतिभालाई उजागर गर्नु कार्यक्रमको मुख्य उद्देश्य भएको बताइन् । कार्यक्रममा विभिन्न विधामा प्रतिस्पर्धा हुनेछ । कार्यक्रमका सहभागीले साहित्य, हस्तकला, मन पर्ने कलाकारको अभिनय तथा खेल प्रस्तुत गर्न सक्नेछन् ।

कार्यक्रमको विजेताले नगद पुरस्कार तथा मेडल पाउनुका साथै जापानको टोकियो हुने कोमिक कोनमा सहभागी हुने अवसर पाउनेछ । कोमिक कोन नेपालको फेसबुक पेजमा करिब तीन लाख फलोअर छन् । त्यसैले यो कार्यक्रममा विभिन्न पृष्ठभूमि, उमेर र परिवारबाट १० हजारभन्दा बढीले सहभागिता जनाउने आयोजकको विश्वास छ ।

प्रकाशित समय : ०२:०० बजे