काठमाण्डु– प्रधानमन्त्री बालेन शाह (बालेन) ले आफू कालो चश्मा लगाएरै प्रतिनिधिसभा बैठकमा उपस्थित हुने...

पुरा पढ्नुहाेस्

global ime bank Long Banner Ad

लाइफ ज्याकेटबिना डुंगा सयर गर्दा बेगनास तालमा दुर्घटना

15.71K
shares

पोखराको बेगनास तालमा शनिबार डुंगा दुर्घटना हुदा दुईजनाको मुत्यु भएको छ । दुर्घटनामा एकै परिवारका तीनसहित ६ जना बेपत्ता भएका छन् । दुर्घटनामा परेका तीन जनाको भने सकुसल उद्धार गरिएको छ ।

शनिबार दिउँसो आफन्तकहाँ दर खान निस्केका ११ जनाको एक समूह बेगनास तालको लिब्दी भन्ने ठाउँमा डुंगा डुब्दा दुर्घटना भएको थियो ।

दुर्घटनामा परी महानगरपालिका–२८ कालिका घर भएकी ५१ वर्षीया कृष्णकुमारी बजगाई र पोखरा–३१, बेगनास घर भएकी वर्ष ३२ की जमुना कडेल गैरेको मुत्यु भएको प्रहरीले जनाएको छ । बेगनासतालबाट उद्धारपछि उपचारको क्रममा बजगाईको लेखनाथ सामुदायिक लायन्स अस्पतालमा र कँडेलको पोखरा स्वास्थ्य विज्ञान प्रतिष्ठानमा मृत्यु भएको कास्की प्रहरीले जनाएको छ ।

वेपत्ता हुनेमा गैंडाकोट घर भएका ३२ वर्षीय रवि खनाल, उनका छोराहरु ८ वर्षीय श्ांकर खनाल र ६ वर्षीय शिव खनाल छन् । त्यसैगरी, बेपत्ता हुनेमा २८ वर्षीया निशा पौडेलका ५ वर्षीय छोरा प्राचीन पौडेल, तनहँुको भिमाद नगरपालिकाका ४ वर्षीय रञ्जित गैरे रहेको प्रहरीले जनाएको छ ।

डुंगा चलाउने रवि खनाल नेपाली सेनामा कार्यरत छन् । रविकी श्रीमती सपना खनालको सकुसल उद्धार गरिएको छ । प्राचीनकी आमा निशाको पनि उद्धार गरिएको छ । हाल उनीहरुको लेखनाथ सामुदायिक लायन्स अस्पतालमा उपचार भइरहेको छ । डुंगामा एक्लै गएका कमल कँडेल तालमा डुंगा पल्टिएको देखेपछि बेहोस भएका थिए । उनी पनि तालमा खसेपछि टोलीले उद्धार गरेको थियो । उनको अवस्था सामान्य छ ।

डुंगा गन्तव्यमा पुग्नुभन्दा करिब डेढ सय मिटरवर दुर्घटना भएको हो । दुर्घटनास्थल बेगनास डुंगाघाँटदेखि करिब २ किलोमिटर टाढा पर्छ । तीज पर्व मान्नका लागि वेगनासताल पारि घर भएका आफन्त कमल कँडेलको घरमा आएको बताइएको छ ।

डुंगामा सवार प्राचीन एक्कासि तालमा खसेपछि आमा निशा उद्धारका लागि तालमा हाम फालेसँगै डुंगा अनियन्त्रित हुँदा पानी पसेर डुब्न पुगेको स्थानीयले बताएका छन् । लाइफ ज्याकेटबिना एकै डुंगामा १० जना सवार भई डुंगाबाट दुई जना खस्न पुगेसँगै अन्य डुंगामा सवार तालमा डुबेको प्रारम्भिक अनुसन्धानबाट खुलेको छ । डुंगा डुवे लगत्तै स्थानीयबासी उद्धारमा जुटेकाले केहीलाई बचाउन सकिएको बेगनास युवा क्लबका अध्यक्ष रामबहादुर रानाभाटले बताए ।

घटनास्थलमा सुरक्षाकर्मी र स्थानीयसँगै गोताखोरसहितको रेस्क्यु टिम परिचालन गर्दा शनिबार बेलुकासम्म बेपत्ताबारे कुनै जानकारी प्राप्त नभएको कास्कीका प्रमुख जिल्ला अधिकारी चक्रबहादुर बुढाले जानकारी दिए । आइतबार गोताखोरको विशेष टोलीबाट बेपत्ताको खोजी गरिने उनले बताए ।

बेगनास ताल डुंगा व्यवसायी समितिका पूर्वअध्यक्ष ढकनाथ कँडेलले बेगनास तालमा अनिवार्य लाइफ ज्याकेट गरिए पनि स्थानीयलाई लागू गर्न कठिन भएको बताए । पोखराको बेगनास तालमा असावधानीका कारण लाइफ ज्याकेटबिना डुंगा सयर गर्दा ठूला दुर्घटना हुने गरेका छन् । बेगनास र फेवातालमा डुंगा सयर गर्दा अनिवार्य रुपमा लाइफ ज्याकेट लगाउनुपर्ने व्यवस्था गरिए पनि कार्यान्वयन हुन सकेको छैन ।