मंसिर २९ गते राष्ट्रियस्तर ह्विलचेयर बास्केटबल प्रतियोगिता
वि.सं.२०७५ मंसिर २७ बिहीवार १९:०८
shares

लायन्स क्लब अफ पोखरा लेकसिटी स्थापनाको २५औं वर्ष गाँठको अवसरमा पोखरामा राष्ट्रियस्तरको ह्विलचेयर बास्केटबल प्रतियोगिता हुने भएको छ । अपांगता भएका व्यक्तिको हौसला बढाउने उद्देश्यले मंसिर २९ गते शनिबार प्रतियोगिता गर्न लागिएको क्लबका अध्यक्ष मदन केसीले जानकारी दिए ।
पोखरा रंगशालामा सञ्चालन हुने प्रतियोगितामा काठमाडौंबाट दुई टिमसहित चार टिमको सहभागिता रहनेछ । प्रतियोगितामा काठमाडौंको जाउलाखेल ह्विलचेयर क्लब र नेपाल स्पाइनल कर्ड इन्जुरी, काठमाडौं, नेपालगन्जको ह्विलचेयर बास्केटबल टिम र घरेलु टिम लेकसिटी ह्विलचेयर बास्केटबल, पोखराबीच खेल हुनेछ । लिग कम नकाउटका आधारमा हुने प्रतियोगिताका विजेतालाई २० हजार, उपविजेतालाई १५ हजार, तेस्रो हुनेलाई १० हजार र शान्त्वना ५ हजार पुरस्कार प्रदान गरिनेछ ।

























