जापानमा ‘कोठा छोड्नुपर्ने डर’ले आमाको शव एक दशकसम्म आफ्नै अपार्टमेन्टभित्र फ्रिजभित्र लुकाउने एक महिला पक्राउ परेकी छन् । आमाको मृत्यु भएको थाहा भएपछि आफूले घर छोड्नुपर्ने डरले फ्रिजमा राखेको बताउने ती महिला प्रहरीले शुक्रबार पक्राउ गरेको हो । योसनोलाई शुक्रबार टोकियो नजिकैको चिबा सहरको एउटा होटलबाट पक्राउ गरिएको बताइएको छ ।

४८ वर्षीया युमी योसिनोलाई आमाको मृत शरीर अन्तिम संस्कार गरी व्यवस्थापन गर्नुको सट्टा फ्रिजमा लुकाएर राखेको र केही समय त्यहाँबाट भागेको आरोपमा पक्राउ गरिएको स्थानीय सञ्चारमाध्यमले जनाएका छन् ।

मृत्यु हुँदा ती महिलाको उमेर ६० वर्ष रहेको हुनसक्ने र महानगरीय ‘हाउजिङ कम्प्लेक्स’मा उनकै नाममा कोठाहरू भाडामा लिएको पाइएको क्योदो न्युज एजेन्सीले जनाएको छ । शव फ्रिजमा फिट गर्न झुकाइएको अवस्थामा राखिएको थियो ।

योसिनोलाई भाडा भुक्तानी नगरेपछि जनवरीको मध्यतिर अपार्टमेन्ट छोड्न भनिएको थियो । त्यसपछि कोठा सरसफाइ गर्ने एक व्यक्तिले ती महिलाको कोठामा फ्रिजभित्र लुकाइएको शव फेलापारेका थिए । शवको परीक्षण (अटोप्सी) बाट महिलाको मृत्युको कारण र मृत्यु भएको समय पत्ता नलागेको तर ती महिलाको शरीरमा देखिने खालको चोटहरू नभेटिएको प्रहरीले बताएको छ ।

प्रकाशित समय : १३:०२ बजे